ئەنکەکەسێ بەرسڤا بەرپرسێن پەیەدێ و ھەسەسەدێ یێن ل دژی ھەرێما کوردستانێ و ھێزێن پێشمەرگە دا

ئەنکەکەسێ بەرسڤا بەرپرسێن پەیەدێ و ھەسەسەدێ یێن ل دژی ھەرێما کوردستانێ و ھێزێن پێشمەرگە دا

ئەندامێ دەستەیا سەرۆکاتیا ئەنجوومەنا نیشتیمانی یا کوردی ل سووریێ (ئەنەکەسێ) سلێمان ئۆسۆ، ب داخویانیەکێ بەرسڤا گۆتنێن بەرپرسێن پەیەدێ و ھەسەسەدێ یێن ل دژی ھەرێما کوردستانێ و ھێزێن پێشمەرگە دا و داخواز ژ پەکەکێ کر، رێزێ ل دەزگەھێن رەوا و یاسایێن ھەرێما کوردستانێ بگریت.

سلێمان ئۆسۆ دیار کر: “ئەنەکەسێ ھەر دەم شەرێ کوردی – کوردی رەد کریە، ژ بەر کو شەر خزمەتا پاشەرۆژا گەلێ کورد ناکەت و دکەڤیتە د بەرژەوەندیێن دژمنێن کوردان دا. ئەنەکەسێ ژی ھەر دەم ھەول دایە ببیتە ھۆکارێ ئاشتی و ئارامیێ د ناڤبەرا ھێزێن کوردستانی دا و چ جارا نابیتە لایەنگرێ ئالیەکێ د چ شەرەکێ چەکداری یێ ل دژی بەرژەوەندیێن گەلێ مە دا و مە ب ئاشکەرا ھەلوەستا خوە دیار کریە کو کیژان ئالی دخوازیت رەوشێ ئالۆز بکەت و ڤی شەری بکەت.”

د داخویانیێ دا ھات دەستنیشانکرن: “مە وەک ئەنەکەسێ، پێشتر د داخویانیەکێ دا بوویەرێن ل ھەرێما کوردستانێ یێن د ناڤبەرا ھێزێن پێشمەرگە و ئەندامێن پارتیا کارکەرێن کوردستانێ دا روو دانە رەد کرنە و مە ئێریشا ل سەر پێشمەرگە د ناڤا خاکا ھەرێما کوردستانێ دا یا کو تێ دا ھەژمارەک پێشمەرگە شەھید و بریندار بوونە ژی شەرمەزار کریە.”

ئۆسۆ ھەروھا ئاشکەرا کر: “ئەم جارەکا دی داخوازێ ژ پەکەکێ دکەین، رێزێ ل یاسایێن ھەرێما کوردستانێ و دەزگەھێن وێ بگریت. دڤێت ھەموو ئالی و ھێزێن کوردستانی رێزێ ل تایبەتمەندیا ھەر پارچەیەکا دی یا کوردستانێ بگرن و بھانەیێ نەدەن دەولەتێن ھەرێمێ کو دەستێوەردانا سیاسی و لەشکەری د پارچەیێن دی دا بکەت.”

سلێمان ئۆسۆ د بەردەوامیێ دا دا زانین: “گەفێن کو ژ ئالیێ بەرپرسێن پەیەدێ و فەرماندارێن ھەسەدێ ڤە ل دژی ھەرێما کوردستانێ تێن کرن، پێشھاتەکا مەترسیدارە، ب تایبەت کو ھەسەدە خوە وەک ھێزەکا نیشتیمانی یا سووری دبینیت و د ناڤا وێ دا چەکدارێن ژ پێکھاتەیێن کورد، عەرەب، سریانی و ئاشووری ھەنە.”

سلێمان ئۆسۆ د بەشەکا دی یا داخویانیا خوە دا گۆت: “ئەڤ گەف و داخویانیێن ھاتنە دایین، پێشھاتەکا مەترسیدارە د ھەلوەستا سیاسی و لەشکەری دا، ژ بەر وێ ژ ئامەریکا دهێتە خواستن ھەلوەستا خوە ژ ڤان گەف و داخویانیانان دیار بکەت، ژ بەر کو دێ ھەرێمێ بەر ب ململانەیێن نوو ڤە بەت و ئەنجامێن وێ دێ نە باش بن.”

پوستێن ھەمان بەش