ئەندامێ کۆمیتەیا پێوەندیێن دەرڤەیێن ئەنجوومەنا نیشتیمانی یا کوردی ل سووریێ (ئەنەکەسێ) ئیبراھیم برۆ دیار کر کو خەلکێ سووریێ تەڤ دخوازن دانووستاندنێ بکەن، لێ د بن بریارێن ناڤدەولەتی دا و د بن چاڤدێریا ناڤدەولەتی دا.
ئیبراھیم برۆ بەشداری بولتەنا نووچەیان یا کوردستان24ێ بوو و ل سەر گۆتنێن فەرماندارێ گشتییێ ھێزێن سووریا دەمۆکراتیک (ھەسەدێ) جەنەرال مەزلووم عەبدی کو گۆتبوو دڤێت دیالۆگ لگەل شامێ دا بهێتە کرن، ئیبراھیم برۆ دیار کر: “ملەتێ سووریێ تەڤ دخوازن دانووستاندنێ بکەن، لێ د بن بریارێن ناڤدەولەتی دا و د بن چاڤدێریا ناڤدەولەتی دا، چ ئالیەک ئەگەر بخوازیت تەنێ لگەل رەژیمێ دا بدەت و بستینیت یا سەرکەفتی نابیت، ژ بەر کو ئەڤ رەژیمە ئەگەر تشتەکێ بدەتە ملەتێ سووریێ، ب دەھ سالان شەر و کوشتن و پەنابەرکرن و ڤالاکرن ل سووریێ نەدکر.”
برۆ دەستنیشان کر: “بێگومان گوھارتنا رەژیمێ، داخوازەکا سەرەکی یا خەلکێ سووریێ یە، بەشار ئەسەد وەکو سەرۆکێ سووریێ ناهێتە قەبوولکرن ژ ئالیێ ھەر کەسی ڤە، ھەتا دۆستێن رەژیمێ ژی دزانن کو بەشار ئەسەد نە چارەسەرییە.”
ئەندامێ کۆمیتەیا پەیوەندیێن دەرڤە یێن ئەنەکەسێ دیار کر: “دانووستاندنێن کوردی – کوردی دەمەکێ درێژ ب چاڤدێریا ئامەریکایێ ھاتن کرن و ھێڤیەک ژ بۆ ملەتێ مە چێکر ژ بەر کو بەرێ سێ رێکەفتن د بن سەرپەرشتیا جەنابێ سەرۆک بارزانی دا چێبوون و پەیەدێ بنپێ کرن. ڤێ جارێ مە گۆت ئامەریکا وەکو ھێزەکا مەزن دێ سەر کەڤیت، لێ مخابن ھەتا نھا ئەو گاڤێن بەربچاڤ نەبوون.”
ئیبراھیم برۆ ئاشکەرا کر “د ئالیێ سەربازی دا ژ سالا 2014ێ ھەتا نھا، ئامەریکایێ گەلەک دانووستاندن د ناڤبەرا مە و ئالیێ دی دا کرن، گەلەک ھەول دا کو کارێ لەشکەری پێکڤە بکەین، لێ قەت قەبوول ناکەن پێشمەرگەیێ رۆژ ڤەگەرن و کارێ خوە بکەن ل دەڤەرێن کوردی، ھەتا نھا گۆتووبێژ ژی ل سەر نەھاتیە کرن.”
ل سەر پرسا “گەلۆ ھوون پێشبینی دکەن کو د دەمەکێ نێزیک دا گۆتووبێژەکا دی یا دیالۆگا کوردی – کوردی چێببیت؟”، برۆ ئاشکەرا کر: “ئەم ب ھێڤی نە کو چێببیت، لێ ئەڤە 6 مەھ ل سەر ئیدارەیا بایدن دەرباس بوون ھەتا نھا نوونەرەکێ خوە ژ بۆ سووریێ ب تەڤاھی نەدانایە. ئەڤە ژی نیشانا گرینگینەدانا ب رەوشا سووریێ ب گشتی یە، ژخوە ب تایبەتی د دەڤەرێن کوردی دا ئامەریکا پیچەکێ چاڤێ خوە گرتیە. ل دەڤەرێن کوردی ب ھەبوونا ئامەریکایێ عەفرین چوو، سەرێ کانیێ چوو، گرێ سپی چوو، گەلەک گرینگی نەدا دەڤەرێن کوردی.”
ROJEVA KURD
