وەزارەتا بەرەڤانییا ئامەریکایێ (پەنتاگۆن) د راپۆرتەکێ دا ژ بۆ کۆنگرێسا وەلاتێ خوە، بەحسا پەیوەندیێن پەکەکێ و میلیشیایێن سەر ب ئیرانێ ل شنگالێ دکەت و رادگھینیت؛ پەکەکە رێگریێ ل جێبەجێکرنا رێکەفتنا شنگالێ دکەت، کو چارەسەریا ھەری باشە ژ بۆ ب داوی ئانینا کێشەیان و ئاساییکرنا رەوشا دەڤەرێ. ھەروھا دیار دکەت کو پەکەکە ناھێلیت رێخستنێن نەتەوەیێن یەکبوویی بچن ناڤ کامپا مەخموورێ ژ بۆ گەھاندنا ئالیکاریان بۆ خەلکێ.
پەنتاگۆن د راپۆرتا خوەیا سالانە دا ژ بۆ کۆنگرەسا وەلاتێ خوە، ھوورگلیێن پەیوەندیێن ناڤبەرا پەکەکێ و میلیشیایێن شیعە یێن سەر ب ئیرانێ یێن ل ئیراقێ ب گشتی و شنگالێ ب تایبەتی ئاشکەرا کرنە.
د راپۆرتێ دا نرخاندنا UNAMI ل سەر رەوشا شنگالێ و سەدەما نەڤەگەرا خەلکێ ئاوارەیێ شنگالێ بۆ سەر جھ و وارێن خوە ھاتیە پێشکێشکرن و دهێتە گۆتن: “ھەبوونا پەکەکێ ل ناڤ شنگالێ سەدەما بۆمبەبارانێن بەردەوام یێن ترکیا و تێکبرنا زێدەترا ئەولەھیا ناڤچەیێ یە.”
UNAMI دیار کریە: “تەڤی ھەبوونا ھەژمارەکا مەزن ئاوارەیێن خەلکێ شنگالێ ل کامپا مەخموورێ، ھەبوونا پەکەکێ رێگرە ل وێ دەرێ UNHCR هاریکاریان بگھینتە خەلکی.”
پەنتاگۆنێ دەستنیشان کریە: “ژ بلی پەکەکێ و یەپەگێ چەند کۆمێن دی یێن میلیشیایان ل ناڤ شنگالێ ھەنە. یەپەگە ژ سووریێ چەکدارا تینیتە ناڤ شنگالێ و حکوومەتا ھەرێمێ ژ ڤی کارێ نەیاسایی نیگەرانە و داخوازا چارەسەریێ دکەت.”
وەزارەتا بەرەڤانییا ئامەریکایێ د راپۆرتا خوە دا بۆ کۆنگرێسێ، پشتەڤانیا رێکەفتنا شنگالێ دکەت و وێ رێکەفتنێ ژ بۆ ئاساییکرنا رەوشا دەڤەرێ چارەسەریا ھەری باش ب ناڤ دکەت.
ھەروھا ب بەلگەیان ژ بۆ کۆنگرەسێ ئاشکەرا کریە کو د ناڤبەرا پەکەکێ و میلیشیایێن شیعەیێن سەر ب ئیرانێ، ل شنگال و دەردۆرا وێ پەیوەندیەکا بھێز ھەیە، ب ئاوایەکی کو میلیشیایێن شیعە خوە کرنە مەرتالەکێ سیاسی و ئەندامێن یەپەگێ د بن ناڤێ خوە دا ڤەشارتنە، ب ڤێ یەکێ ژی بنپێکرنێن وان ل ھەمبەر رێکەفتنا شنگالێ بەردەوامن. ھندەک جاران ژی ئیران ژ بۆ رووبرووبوونا ھەژموونا ترکیێ ل دەڤەرێ، فەرمانا ئێریشکرنا سەر ترکیێ ددەت و چەند جاران ژی میلیشیایێن سەر ب ئیرانێ ئێریش کرنە سەر بنکەیێن سەربازی یێن ترکیێ و مووشەکباران کرنە.
ڤێ یەکێ ترکیا نیگەران کریە و بەردەوامە د بۆمبەبارانێن خوە دا، کو ژ بەر بۆمبەبارانێن وێ، ب سەدان گوند ڤالا بوونە و ب ھەزاران نشتەجیێن گوندێن ھەرێما کوردستانێ ژی ئاوارە بوونە، ب تایبەتی ل دەڤەرێن سنۆری.
