پەکەکێ کەچەکا 15 سالی رەڤاند
چەکدارێن پارتیا کارکەرێن کوردستانێ کەچەکا 15 سالی ل ناڤا باژارێ شەھبایێ یێ حەلەبێ رەڤاندیە و چەکدار کریە.
کەچەکا ب ناڤێ فاتیما نەسانە، ژ ئالیێ “رێخستنا جوانێن شۆرەشگەر” یا سەر ب پەکەکێ ڤە ل ناڤچەیا شەھبایێ ل گوندەوارێن حەلەبێ ھاتیە رەڤاندن.
بابێ فاتیما نەسانە کو نەخوەشیێن وی یێن دەمدرێژ ھەنە د کورتەڤیدیۆیەکی دە راگھاندیە:” فاتیما کار دکر و دەبارا مالباتا مە دکر.”
باڤێ فاتمایێ ھەروەھا راگهاندیە: هەیا نها چارەنووسا فاتمایێ نە خویایە و داخواز ژ رایەدارێن پەکەکێ ل رۆژئاڤایێ کوردستانێ کر، کەچا وی ئازاد بکن.
رێخستنێن مرۆڤی بەردەوام داخوازێ ژ پەکەکێ دکەن زارۆکێن تەمەنێ وان د ژێر 18 سالان دا چەکدار نەکەت و د شەرێ خوە دا نەدەتە کوشتن. لێبەلێ پەکەکە بەردەوامە لسەر رەڤاندن و چەکدارکرنا زارۆکان.
چالاکڤانێن رۆژئاڤایێ کوردستانێ ئاماژە ب وێ یەکێ دکەن کو “جوانێن شۆرەشگەر” چەندین بارەگەھ ل باژارێن رۆژئاڤایێ کوردستانێ ژ بۆ چەکدارکرنا زارۆکان داناینە و تێدا زارۆکان چەکدار دکەن.
