یەک دن ژ روویێن جوان یێن دەڤەرا بەرواری بالا “مەجید پیرمۆس محەمەد”ە، ئەو ب دەستێ چەکدارێن یەک ژ رێخستنێن هووڤ ب ناڤێ “پەکەکێ” کو خوە وەکە رێخستنەکە کوردی ددە ناسکرن هات شەهیدکرن، مەجید پیرمۆس د ژیێ 19 سالیێ دە دبە پێشمەرگە، ل سەر چیایێن کوردستانێ وەکە تەیرێ باز دفرە و ژ بۆ ئازادیا گەل و ولاتێ خوە هەموو ئاستەنگیان دەرباس دکە، هەموو نەخوەشیان دبینە لێ بەلێ هەرتم ب هێڤی یە و ت تشت وی ژ خەباتا وی پاشڤە نابن، نە سەرمایا زڤستانێ، نە گەرمایا هاڤینێ، نە ئەڤرازیێن چیا و نە تۆپ و تانکێن دوژمن، ت تشت نکارە رێ ل همبەر وی بگرە و وی ژ خەباتا ژ بۆ ئازادیا وەلاتێ وی پاشڤە ببە.
ئەو ل سالا 1967ان ل گوندێ راڤینا یێ سەر ب دەڤەرا بەرواری بالا د ناڤا مالباتەک نشتمانپەروەر ژ داییک دبە، هەر ل زارۆکینیێ شەیدایێ چیایێن کوردستانێ دبە، خواندنا سەرەتایی ل گوندێ راڤینا و خواندنا ناڤنجی ل کانی ماسێ ب داوی تینە، ل سەر رێبازا باڤێ خوە یێ شەهید “سلێمان پیرمۆس” بەردەوام دبە و ل سالا 1986ان تەڤلی رەفێن پێشمەرگەیێن رێیا ئازادیا کوردستانێ دبە.
شەهید مەجید پیرمۆس ل سالا 1991ان بەشداری سەرهلدانا باشوورێ کوردستانێ دبە، پاش سەرهلدانێ ڤەدگەرە سەر ئاخا باڤ و پایپیرێن خوە و ل گوندێ راڤینا نیشتەجی دبە، ڤیانا وی ژ بۆی وەلات و کارێ وی یێ پیرۆز ب داوی نایێ و وەکە پێشمەرگەیەک لەهەنگ هەیا سالا 1999ان ل سەر کارێ خوە بەردەوام دبە، پاشان هەیا سالا 2002ان ل ئاسایشا کانی ماسێ دشۆغلە.
پشتی هاتنا تەرۆریستێن داعشێ شەهید مەجید پیرمۆس دەست تاڤێژە چەکا خوە و ژ بۆی پاراستنا گەل و ولاتێ خوە دیسا دەست ب کارێ خوە یێ پیرۆز دکە و وەکە پێشمەرگەیەک دچە میحوەرا سەدا مووسل و ل ور درێژیێ ب خەباتا خوە یا ژ بۆی کوردستانێ ددە. ئەو ژ تانک و تۆپێن رەژێما هووڤ یا بەعسیا، ژ سەرما و گەرمایا ل چیایێن کوردستانێ ژ دەربەدەری و هەموو نەخوەشینا، ژ فیشەک و تیئێنتیێن رێخستنا تەرۆریستی یا داعشێ ژی خلاس دبە، لێ بەلێ پشتی بەرخوەدانەک هەری مەزن نە ب دەستێ دوژمنەک دەرکی، نە ب دەستێ ترکیێ یان ئیران و سووریێ، نە ب دەستێ تەرۆریستێن داعشێ بەلکو ب دەستێ چەکدارێن رێخستنەک کوردی تێ شەهید کرن و 10 زارۆکان ل پشت خوە دهێلە.
بەلێ، کەسێ کو ب سالان ل چیایێ کوردستانێ ژ بۆی ئازادیا کوردستانێ شەر دکر و تەڤ نەخوەشی ب چاڤێن خوە دیتن، کەسێ کو ژ فیشەک و تی ئێن تی یێن تەڤ دوژمنێن دەرەکی یێن کوردستانێ خەلاس بووی، ژ دەستێ تی ئێن تی یێن پەکەکێ خەلاس نەبوو و ل رۆژا 6/7/2018 ب دەستێ پەکەکێ شەهید بوو، پەکەکێ ل سەر رێیا وی TNT دەینا و ئەو ژ مالباتا وی یا ولاتپارێز، ژ ولاتێ وی و ژ زارۆکێن وی یێن بەلەنگاز ستەند و تەڤلی کاروانێ شەهیدێن کوردستانێ کر.
ل شوونا کو پەکەکە بچە و ل باکورێ کوردستانێ تی ئێن تیێ ل سەر رێیا دوژمنێن کوردستانێ، ل سەر رێیا لەشکەرێن ترکیێ و ترکێن فاشیست دانە هات و ل سەر رێیا پێشمەرگەیەک کورد، ولاتپارێزەک کورد ئێ باڤێ 10 زارۆکا ب ناڤێن “مەتین، گارە، سەفین، کاوە، کارزان، بلند، ئاڤەند، ئامەد، محەمەد و بەفرین” دانا و ئەو شەهید خست.
