نوری چەلیک
ئەزێ د ڤێ نڤیسینا خوە دا دخوازم پێویستیا مناقەشەیا کێشەیا چارەسەریا پەکەکێ یا ب لایەنێ کوردان ڤە گرێدایی و ب تایبەت ژی ئەرکێ سەر ملێ کوردێن باکورێ کوردستانێ بدەمە دیارکرن. ئیرۆ ھەرێمەک ژ وەلاتێ کوردان، باشوورێ کوردستانێ، بەر ب دەولەتبوونەکا سەربخوە ڤە دچیت، پێنگاڤێن پاشەرۆژا سەرخوەبوونا کوردستانێ ل وی بەشی دهێنە هاڤێتن.
پیدڤیە ئەڤە، سەربلندی و خوەشیا دلێ ھەر کوردەکی بیت، ھەر کوردەک دەستێ هاریکاریێ و پشتگریێ درێژی ڤی بەشی بکەت دا کو رۆژەک بەری رۆژەکێ کورد چارەنووسا خوە ب دەستێ خوە بنڤیسن.
د دەمەک وەک ئیرۆ دا کو داگیرکەرێن کوردستانێ ب ھەر شێوەیی ئێریشی باشوور دکەن و دخوازن دەستکەفتیێن ھەیی ژ ھۆلێ راکەن، مافێ چ کوردەکێ نینە کو ڤێ ئارامی و ئاھەنگییا ھەیی ژ بۆ بەرژەوەندییێن ئۆل یان ھەرێما خوە تەڤ بدەن.
پیدڤیە سەرۆک و دەزگەھێن باشوورێ کوردستانێ ژی ل گۆر ھەقیقەت و بەرژەوەندییێن کوردستانێ خزمەتێ بکەن. د ئاڤابوونا ھەر دەولەت و دەزگەھەکێ دا خەلەتی و کێماسی چێدبن. سازکرن و برێکووپێکبوونا وێ دەولەتێ پیدڤی ب دەمەکێ دوور و درێژ ھەیە.
ھەلبەت دڤێت ئەو خەلەتی یان کێماسییێن کو تێنە دیتن ب زمانەکێ برایەتی و دۆستانی بێنە رەخنە کرن. لێ گاڤا رەخنە ژ رەخنەبوونا خوە دەرکەڤیت و دبیتە چەکا پاراستنا بەرژەوەندییێن ھەرێمی، وی دەمی سنۆرێن رەخنەکرنێ ژ ھۆلێ تێنە راکرن و دژمناتی دەستپێدکەت. ئەڤە ژی د خزمەتا دژمن و خێرنەخوازێن کورد و کوردستانێ دا یە.
ئەز باوەر ناکەم (ژ بلی سەرۆک و ھندەک رایەدارێن پەکەکێ) کوردەک دی رابیت بێژیت :”ئەز کوردستانەکا سەربخوە یان ژی فەدرال ناخوازم”. د دلێ ھەر کوردەکێ دا خەون و خەیالا کوردستانا مەزن و یەکگرتی ھەیە. لێ شەرتان وەسا کریە کو ئەم بخوازین و نەخوازین، کوردستان چار پارچەیە، کورد د وەلاتێ خوە دا ژ ھەڤ ھاتنە تاروومار کرن. 4 ھەرێمێن جودا و ھەر یەک ژ وان دخوازیت ب سەرێ خوە ببیتە هەرێمەکا سەرەکی.
گاڤا ئەم ھەژمارا کوردان بدەینە سەر ھەڤ، باکورێ کوردستانێ بەشێ ھەری مەزنە. گاڤا ئەم ل گۆرا ھەژمارێ بلڤین، ھندەک دکارن بێژن دڤێت باکوری سەپەرشتیا کوردا بکەن. لێ واقع حالی ھەیی مرۆڤان مەجبوری واقعێ ھەیی دکەت کو، ئەو ژی ئەوە ھەرێمەک ژ ھەرێمێن کوردستانێ ئازادیا خوە بدەست خستیە.
دڤێ ئەم کورد ڤێ دەستکەفتێ د قادا ناڤدەولەتی دا باش ب کار بینین دا کو ھەرێمێن دی ژی ب کارن وان دەستکەفتا ب رێیەکا یاسایی بێخنە رۆژەڤا جیھانێ. کوردێ ل ھەرێمێن نە ئازاد کری د ڤی واری دا خوەدی مافن. لێ وەک مە ل ژۆر ژی بەحس کر، پارچەبوونا کوردستانێ کورد د ھەر واری دا ژ هەڤدو بەلاڤ کرنە. ژ بەر ڤێ ژی، دڤێت پەنجەرا رۆناھیا باشوورێ کوردستانێ وەک رۆناھیا چاڤان بهێتە پاراستن. و دڤێت ئەم چ فەرقیێ نەێخین ناڤبەرا نەتاوا خوە.
چاوا کو سەرۆک مستەفا بارزانی د دەما خوە دا گۆتبوو:”چ کەسێ کو روحا نەتەوەپارێزی بۆ چێنەبووبیت، دێ رۆژەک ژ رۆژان خیانەتێ ل گەلێ خوە کەت” ئەڤ گۆتنە ژ بۆ ئیرۆ و ژ بۆ ھەر دەمەکێ ژی دەرباس دبیت.
ئیرۆ پرسگرێکا سەرەکی یا د ناڤ کوردان دا، پرسگرێکا پەکەکێ و کوردێ دەرڤەیی پەکەکێ یە. ھەر چەند ھەبوونا پەکەکێ یا ل قەندیل و دەڤەرێن دی ژبۆ حکوومەتا کوردستانێ ژی سەرێشاندنەکێ چێکەت ژی، دڤێت ژ باشوورییان زێدەتر ئەم کوردێن باکور سەرێ خوە ب ڤێ پرسگرێکێ بێشینن.
د داخویانی و ھەلوەستێن ھندەک رایەدارێن پەکەکێ دا دیار دبیت کو، پەیوەندیێن ھەرێما کوردستانێ یێن لگەل داگرکەرێن جیران دا ئەو نەرەحەت کرنە. گەر پەکەکە بشێت سەبەبێ نەرەحەتیا خوە ل سەر ئەساسێ کوردایەتی ژ بۆ حکوومەتا فەدەرال یا کوردستانێ بینیتە سەر زمان، ئەز باوەرم دێ وەک حکوومەت، ھەرێما کوردستانێ ژی شێت چارەسەریەکێ ژ بۆ نەرەحەتیا پەکەکێ ببینیت. ژ خوە بەیانێن سەرۆکێ کوردستانێ یێ د وی واری دا گەلەک زەلالن. سەرۆکێ کوردستانێ د ھەر فرسەندێ دا چارەسەریێ د ریا دیالۆگ و ریێن بێ چەک بوونێ و دەمۆکراتیک دا تینە سەر زمان.
دڤێت ئەم باکوری ژ نھا دا بزانین کو، ھەگەر سبەهی یان دوسبا باکورێ کوردستانێ ئازاد بوو، دێ ئەڤ پرسگرێکا پەکەکێ ل باکور ژی دەستپێکەت. پرسگرێکا ھەیی پرسگرێکا تەمامێ کوردستانێ ژی بیت، دڤێت ئەم باکوری ژ ئیرۆ دا ب بەرپرسیاری تەڤ بگەرین و خوەدی سیاسەتەکا نەتەوی بین. یان نە سبەهی ئەم ژی دێ تووشی شیدەتا پەکەکێ بین. و وێ گاڤێ ئەم ژی دێ کەڤینە رەوشا کو نھا ل باشوور د ناڤبەرا داگیرکەرێن کوردستانێ و ھەموەلاتیێ وێ دا ھەیی.
پرسگرێکا چارەسەریا پرسگرێکا پەکەکێ و خوەدی لێ دەرکەتنا وێ، نە ئەرکێ باشوورە. ھەگەر ل باشوور پرسگرێکا تونەکرنا پەکەکێ ھەبیت، ئەرکا پێشین دکەڤیتە سەر ملێن باکورییان ب خوە و دڤێت ئەو ل خوە و ل دەسکەفتیێن خوە خوەدی دەرکەڤن.
دڤێت د سەری دا پەکەکە ب رێیێن دەمۆکراتیک ل چارەسەرییا ڤێ پرسگرێکێ بگەریت. لێ گاڤا پەکەکە وان دەستکەفتیێن کوردا بکەتە قوربانا شەخس یان ھەرێمەکێ دڤێت ئەم کوردێن باکور ب دەنگەک بلند نە رازیبوونا خوە ل ھمبەر ھەلوستێن پەکەکێ یێن نە د بەرژەوەندیا مللەتێ کورد دا بقێرین.
ئەو رۆژ ژی ئیرۆیە…. پەکەکێ ژ نوو ڤە دەست ب پرۆپاگاندا دژبەریا پەدەکێ و بارزانیا کریە و ب درەوان دخوازیت ل باشوورێ کوردستانێ ھەموەلاتی ب ناڤێ “خوە پاراستنێ” ل دژی حکوومەتا خوە کار بکەن. ژ وێ بۆنێ ژی دڤێت هەموو کورد ب دەنگەکێ بلند بقیرن و بێژن ئێدی بەسە بۆ زلما پەکەکێ.
