ئه‌مه‌ریكا دەربارێ مانا ل کوردستانێ گومانان ناهێلیت
کۆنسولێ گشتیێ ئه‌مه‌ریكا ل هەولێرێ رۆبێرت پالادینۆ رادگه‌هینیت، ئه‌مه‌ریكا دێ ل هەرێما کوردستانێ و ئیراقێ مینیت و رەوشا وان ژ یا ئەفغانستانێ جودایە.
کۆنسولێ ئه‌مه‌ریكا ل هەرێما کوردستانێ رۆبێرت پالادینۆ ئیرۆ د کۆنفرانسەکا رۆژنامەڤانی دا ل هەولێرێ راگه‌هاند، «سەرۆک بایدن د گرنگییا هەرێما کوردستانێ و ئیراقێ دگه‌هیت و ب رۆنی ژ سەرۆکوەزیرێ ئیراقێ مستەفا کازمی را گۆت کو ئارامییا ئیراقێ ژ بۆ هەرێمێ گرنگە».
گۆت ژی: «رەوشا ئیراقێ ژ یا ئەفغانستانێ جودایە، شەرێ داعشێ ب داوی نەبوویە و بەرژەوەندی دخوازن کو په‌یوەندیێن ئه‌مه‌ریكا و ئیراقێ بەردەوام بن».
رۆبێرت پاڵادینۆ تەکەز کر: «په‌یوەندیێن بایدن یێن بهێز دگه‌ل هەرێما کوردستانێ هەنە، ئه‌مه‌ریكا ژ هەرێما کوردستانێ و ئیراقێ دەرناکەڤیت، تەنێ هێزێن شەرکەرێن ئه‌مه‌ریكا ژ ئیراقێ دێ هێنه دەرێخستن».
کۆنسولێ ئه‌مه‌ریكا ب زمانێ کوردی ژی گۆت: «حه‌ز دکه‌م په‌یوەندییان بگه‌هینم ئاستەکێ بلندتر، ژ بۆ بەرژەوەندییا هەرێما کوردستانێ و ئه‌مه‌ریكا».
راگهاند ژی: «ئەم پابەندی په‌یوەندیێن دەم درێژێن ب هەرێما کوردستانێ و ئیراقێ را ینە، نها په‌یوەندیێن د ناڤبەرا گەلێ کوردستانێ و ئه‌مه‌ریكا دا ژ هەر دەمەکێ دی بهێزترن و دێ بەردەوام بن ژی».
