یه‌كێتییا نشتیمانییا كوردستانێ، به‌رسڤا داخویانیێن ئالدار خه‌لیل ئه‌ندامێ رێڤه‌به‌رییا په‌یه‌دێ دا و ژێره گۆت كو ئێدی ده‌ستوه‌ردانێ د كاروبارێن ناڤخوه یێن یه‌نه‌كێ دا نه‌كه‌ت و گۆتنێن وی ب «بێ ئاست و نه‌گونجاو» ناڤ كرن.
ئالدار خه‌لیل كو به‌رییا نها ل سه‌ر كه‌نالا رۆژئاڤا كوردستانێ ده‌ركه‌ت و نرخاندن ژ بۆ ره‌وشا یه‌نه‌كێ كربوو و گۆتبوو: «كریزا د ناڤا یه‌نه‌كێ دا، ب باندۆر و ده‌ستوه‌ردانا ده‌وله‌تا تركیێ پێكهاتییه»، هه‌موه‌خت گۆتبوو: «سیاسه‌تا یه‌نه‌كێ ل گه‌ل سیاسه‌تا ئاردۆگان نه‌گونجایه، ژ به‌ر ڤێ سه‌ده‌مێ تركیێ كریز د یه‌نه‌كێ ده چێكرن».
د به‌رسڤا ڤان گۆتنێن ئالدار خه‌لیل یێ ئه‌ندامێ په‌یه‌دێ و په‌كه‌كێ، ئیرۆ رۆژا شه‌مبی 4/9/2021ێ ژێده‌ره‌كی ژ مه‌كته‌با سیاسییا یه‌نه‌كێ داخویانی دا و ژ ئالدار را گۆتییه كو ئه‌ڤ گۆتن ناهێنه قه‌بوول كرن.
یه‌نه‌كێ ئالدار لایقی به‌رسڤدانێ نه‌دیت و گۆتییه نرخاندێن وی بێ ئاستن
د داخویانییا یه‌نه‌كێ دا گۆتنێن ئالدار خه‌لیل ب «بێ ئاست و نه‌گونجاو» هاتنه نرخاندن و ژێرا گۆتییه: «ده‌ستوه‌ردانا د كاروبارێن ناڤخوه یێن یه‌نه‌كێ دا ناهێت قه‌بوول كرن».
داخویانییا یه‌نه‌كێ ئه‌ڤ ژی ژ ئالدار را گۆتییه: «باشتره ئالدار خه‌لیل و په‌یه‌ده هێز و شیانێن خوه ژ بۆ چاره‌سه‌ر كرنا وان پرسگرێكان ب كار بینن یێن كو گه‌لێ مه یێ كورد ل رۆژئاڤا وه‌لات راستی هاتنه و ئێدی ده‌ستوه‌ردانێ د كاروبارێن ناڤخوه یێن پارتیێن كوردستانی دا نه‌كه‌ن».
هێژای گۆتنێ یه، هه‌ر چه‌نده كو ئالدار خه‌لیل خوه وه‌كه رایه‌داره‌كێ كورد حساب دكه‌ت و ئه‌و دفكریت كو نرخاندنێن وی گرنگی پێ دهێته دان، لێ به‌لێ یه‌نه‌كێ ئه‌ڤ كه‌س ووسا بێ ئاست نیشان دایه كو هێژای چ به‌رسڤدانه‌كێ نینه، لوما به‌رسڤا وی ژی نه ژ ئاستێ بلند هاتییه دان، لێ به‌لێ داخویانی ل سه‌ر زارێ ژێده‌ره‌كی ژ مه‌كته‌با مه‌دیا یه‌نه‌كێ هاتییه به‌لاڤ كرن.
