رێخستنا تەرۆریست یا داعشێ ئیرۆ سپێدێ ل کەرکووکێ هێرش كره نوقته‌یه‌كا ئەولەکاریێ یا پۆلیسان و 13 پۆلیس هاتنە کوشتن.
ئیرۆ سپێدێ ئێكشه‌مبێ 6/9/2021ێ، ل هەرێما رەشاد یا ژێرییا کەرکووکێ هێرش هاتییه كرن، وەک ئەفسەرەکی پۆلیسێن ئیراقێ دبێژیت، هێرش ب دەمەکی کورت پشتی نیڤ شەڤێ هاتییە دەستپێکرن.
ئەفسەرێ کو نەخواستی ناسناما وی بهێته دیار کرن گۆتییە ئاژانسا نووچەیان یا فرەنسی :AFP «چەکدارێن دەولەتا ئیسلامێ، خالەکا ئەولەکاریێ کرییە ئارمانج، د وێ هێرشێ دا 13 پۆلیس هاتنە کوشتن».
ده‌ست نیشان كر، د هه‌مان هێرشێ دا، 8 پۆلیس ژی بریندار بوونه، داعشێ هێرشێن خوە ل رۆژئاڤایێ کەرکووک و سنۆرێن مەخموورێ زێده كرنه، هێزێن ئەولەکارییا ئیراقێ ژی ل هەرێمێ کەتینە د ئامادەباشیان دا.
