ئەنجوومەنا نشتیمانی یا کورد ل سووریێ (ئەنەکەسێ) ئێریشێن کۆما ب ناڤێ “جوانێن شۆرەشگەر”ێن ل سەر خوەپێشاندانا قامشلۆ و ئۆفیسێن ئەنەکەسێ شەرمەزار کر و راگھاند، ئەو ئێریش وان ناترسینن.
ئەنەکەسێ 24ێ ئیلۆنێ ل دژی بلندکرنا نرخێ سۆتەمەنیێ، بوھابوونا کەلووپەلان و گرتنا ئەندام و ئالیگرێن ئەنەکەسێ، خوەپێشاندان ل چەند باژار و باژارۆکێن جزیرا رۆژئاڤایێ کوردستانێ ل دار خستبوون و د خوەپێشاندانا قامشلۆ دا کۆما ب ناڤێ جوانێن شۆرەشگەرێن ئالیگرێن پەکەکێ ئێریشی خوەپێشاندانێ کربوون و ھەژمارەک کەس ژی بریندار کربوون.
ئەنەکەسێ د دەربارێ ئێریشێن جوانێن شۆرەشگەر دا، داخویانیەک دا و گۆت، “جوانێن شۆرەشگێر کو ئالایێ پەکەکێ راکربوون، ب دار و کەڤر و تەقەمانیان ئێریشی خوەپێشاندەران کرن و د ئەنجامێ دا ھەژمارەکا خوەپێشاندەرا بریندار بوون و زرارێن مادی گھیشتن مال و ملکێ خەلکی.”
ئەنەکەسێ ھەروھا دیار کر: “د 25ێ ئیلۆنا 2021ێ، چەکدارێن سەر ب پەیەدێ ڤە، ل سەر دیوارێ نڤیسینگەھا پەدەکەسێ یا رۆژھلاتی قامشلۆ و دکانێن دەردۆرا ئۆفیسێ سلۆگان و گۆتنێن خراب و خیانەتێ نڤیساندبوون. ھەروھا دهێتە زانین کو ئەڤە نە جارا یەکەمە کو چەکدارێن سەر ب پەیەدێ ڤە، کریارێن ب ڤی ئاوایی پێک تینن، پێش نها ژی چەندین جاراب ئەندام و ئالیگرێن ئەنەکەسێ رەڤاندنە و ئێریشی سەر نڤیسینگەهێن وێ کریە و شەوتاندنە.”
ئەنەکەسێ ئەو ئێریش و کریارێن “جوانێن شۆرەشگەر” شەرمەزار کرن و خواست، گرتی و رەڤاندی د زووترین دەم دا بێنە ئازادکرن و دەستنیشان کر، ئەو ئێرش وان ناترسینن.
