ھەڤسەرۆکێن ھەدەپێ د ڤێ دەما کو ل ترکیێ گۆتووبێژێن ل سەر چارەسەرکرنا پرسا کورد و ھەڤپەیمانیێن ژ بۆ ھلبژارتنان گەش بوونە، تەسبیت، نێرین، رێباز و پرەنسیبێن خوە د بن 11 خالان دا ژ بۆ ئالیێن سیاسی و رایا گشتی پارڤە کرن.
ئەو 11 خالێن کو د بەیاننامێ دا ھاتنە رێزکرن ئەڤەنە؛ دەمۆکراسیەکا بھێز، دادگەهەکا بێ ئالی و سەربخوە، ئیرادەیا گەل، نە رەژیما قەیوومان، چارەسەریا دەمۆکراتیک ژ بۆ پرسگرێکا کوردان، دیپلۆماسیەکا ئاشتیانە، ئازادی و وەکھەڤیا ژنان، د ئابۆریێ دا دادپەروەری، د رێڤەبریا گشتی داە لیاقەت، پاراستنا خوەزایێ، ژیانەکا ئازاد ژ بۆ گەنجان و دەستۆرەک دەمۆکراتیک.
ھەدەپە دبێژیت، “کیژان ئالیێن جڤاکی و ئاکتۆرێن سیاسی ل دۆر ڤان رێبازا و پرەنسیبان بخوازیت لگەل مە دا دانووستاندنا و گۆتووبێژان بکەت، ئەم ئامادەینە کو لگەل وان دا بمەشین و تێکۆشینەکا ھەڤپار و رێڤەبەریەکا ھەڤپار ئاڤا بکەین.”
ئەڤە دەمەکە نیقاشا ل سەر “تفاقێن ھلبژارتنێ” ژی گەرم بوویە و تێکلداری ڤێ مژارێ ژی ھەدەپە تەکەز دکەت، “ئەم ژ بۆ ھلبژارتنێن پارلەمانی، دخوازین ب درووشما “تفاقا دەمۆکراتیک” مەشا خوە یا تفاقا گەلان و تفاقا ئاشتیێ و تفاق و پشتەڤانیا ژنان بەردەوام بکەین.”
ھەروەھا ھەدەپێ بانگ ل ھەموو سازی و دەزگەھ و پارتی و ھەر وەلاتیەکی ترکیێ ژی کر کو “سبەرۆژەکا رۆناک دخوازیت” و گۆت، “بەرپرسیارییا مە ھەموویانە. ئەم ل شوونا حەسابێن شەخسی و بەرژەوەندیێن پارتیزانیێ، ب ئاقلەکی ھەڤپار و ب ھەڤ را سبەرۆژێ ئاڤا بکەین.”
