ده‌وله‌تا تركیێ ژ بۆ ئاماده‌كارییا ئۆپه‌راسیۆنه‌كه سه‌ربازی، هێزه‌كه له‌شكه‌ری شاندییه سینۆرێ كۆبانێ و سه‌رێكانیێ.
نه‌رینگه‌ها سووری یا مافێن مرۆڤان به‌لاڤ كر، ئارتێشا تركیێ كاروانه‌كێ نوو یێ هێزا له‌شكه‌ری كو ژ ئه‌ره‌به‌یێن زره‌خێ و بارهه‌لگرێن پڕی چه‌ك و ته‌قمه‌نی پێكهاتییه، ل سینۆرێ كۆبانێ یا رۆژئاڤایێ كوردستانێ ب جیهـ كرییه، هه‌روه‌ها كاروانه‌كه دن شاندییه سه‌رێ كانیێ.
جیهـ كرنا ڤان هێزان هه‌موه‌ختا گه‌فخوارنێن تركیێ یێن ده‌ست پێ كرنا ئۆپه‌راسیۆنه‌كه نوو ل رۆژئاڤایێ كوردستانێ تێ.
رۆژا سێشه‌مییا رابووری پارلمه‌نا تركیێ ل سه‌ر داخوازییا تاییپ ئاردۆگان ته‌زكه‌ره‌یا درێژكرنا ئه‌ركێن ئارتێشا تركیێ ل ئیراقێ و سووریێ نیقاش كر و ب پرانییا ده‌نگان هات ئه‌رێ كرن، ئاكه‌په، مه‌هه‌په و ئی پارتیێ ده‌نگ ب به‌لێ دا، هه‌موه‌خت جه‌هه‌پێ و هه‌ده‌پێ ل دژ ده‌ركه‌تن.
