هه‌ده‌پە ژ بۆی گرتنا حه‌فزوللا کوتوم بێدەنگ ما

hdp-hifzulla-kutum-turkey-kurd-kurdistan-ilon (2)

هه‌ده‌پە ژی بۆی ئاکادەمیسیەنێ کورد حه‌فزوللا کوتوم کو ب سه‌ده‌ما پارڤەکرنا پەیڤا کوردستان هاتییە گرتن، بێ ده‌نگ مایه‌، ناڤەنداهه‌ده‌پێ و پارلمه‌نته‌رێن وێ ژ بۆی گرتنا کوتوم نە هاتن دەنگ.

ئالیکارێ لێکۆلینێ یێ زانینگەها فراتێ حه‌فزوللا کوتوم، ژ بەر به‌لاڤ كرنا «شۆرەشا ئیلۆنێ ل هەموو کوردان پیرۆز بە، بژی کوردستان» ل سەر مەدیایا جڤاکی، ژ ئالیێ زانینگەهێ ڤە ژ وەزیفەیا وی هاته‌ دوور خستن، پشتره‌ هاته‌ بن چاڤ کرن.

کوتوم راگه‌هاند ل ده‌ستپێكێ ب رێیا تویته‌رێ گه‌ف لێ هاتنه‌ كرن پشترە ژی هاته‌ گرتن، لێ بەلێ ئەڤ بوویەر ژ هێلا په‌كه‌كێ ڤە نه‌هات دیتن، خوه‌ ناڤەندا هه‌ده‌پێ و پارلمەنتەران ژی بوویەر شه‌رمه‌زار نه‌ کرن، تەنێ پارلمەنتەرێ هه‌ده‌پێ عومه‌ر فارووق گەرگەرلیئۆگلو ل حه‌سابا خوه‌ یا تویته‌رێ حکوومەت ره‌خنه‌ کر.

گەلۆ کوتوم هەگەر شۆرەشا کوبا پیرۆز كربا هه‌ده‌په‌ دا چ بێژیت؟

هه‌ده‌په‌ ل ناڤ سنۆرێن ترکیێ تەڤاهی مافان دکەته‌ رۆژەڤ، ژ مافێن ئابۆری، مافێن ئاژەلان هەتا مافێن دورەگەزی ژی دکەته‌ رۆژەڤ، داخویانییان دده‌ت، خوه‌ ل ئالێ دی یێ دنیایێ ژی خوه‌ ل بنپێكرنا مافان دكه‌ته‌ خودان و شه‌رمه‌زار دكه‌ت، لێ بەلێ ل هەمان دەمێ بنپێکرنا مافێن حه‌فزوللا کوتوم و قەدەغەکرنا گۆتنا کوردستان نابینیت.

ژ بۆ گرتنا حه‌فزوللا کوتوم گەلەک پارتیێن کوردان ل هەمان دەمێ یێن ترکیێ ژی ئەڤ یەک شەرمەزار کرن، لێ بەلێ پارتیێن ئاکه‌پێ، مه‌هه‌پێ و هه‌ده‌په‌ بێ دەنگ مان، ئانكو هه‌ده‌پێ د قەدەغەکرنا پەیڤا کوردستان دا ل کێلەکا ئاکه‌پێ و مه‌هه‌پێ جهـ گرت.

گەلۆ شۆرەشا کۆبا هێژایه‌ لێ بەلێ یا کوردستانێ بێ قیمەتە!!

بێگومان کو هەگەر کوتوم ژ بۆی شۆرەشا کۆبا یان ژی فه‌له‌ستینێ پیرۆزباهی وەشاندبان هه‌ده‌پە دا لێ خوەدی دەرکەڤیت، ژ بەر کو ئەو تەڤاهی شۆرەشان پیرۆز دیبینیت و ته‌نێ شۆرەشا کوردستانێ بێقیمەت دبینیت.

شۆرەشا ئیلۆنێ کو ژ بۆی باشوورێ کوردستانێ قووناغەکا گەلەک گرنگ بوو، ژ بەر کو ڤێ تەکۆشینێ وه‌كر کو ئیرۆ کوردێن باشوورێ کوردستانێ ببن خودان ستاتۆ و هەرێمەکا سه‌ربه‌خۆ، لێ بەلێ هه‌ده‌پە ڤێ یەکێ نابینیت، هه‌ده‌په‌ مینا دەولەتا ترک یا داگیركه‌ر شۆرەشا کوردستانێ ب خەتەر دبینیت.

هه‌ده‌پە تەنێ ژ بۆی خوە دەمۆکراسیێ دخوازە

هه‌ده‌پە گەلەک جاران دبێژیت کو ئەم نەپارتییا کوردانین، پارتییا ترکیێ نە، ل هەمان دەمێ خوە ب نوونەرا کوردان ژی دبینیت، لێ بەلێ ل هەمان دەمی هه‌ده‌پە ل سەر تشتێن کو دەولەتا ترک ژی پێ عاجز دبیت، بێدەنگ دمینیت.

هەلوەستا هه‌ده‌پێ کو بەرانبەر کوتوم بێدەنگ مای جارەک دی ڤێ پرسێ دئینیته‌ بیرا مه‌: گەلۆ رۆلا هه‌ده‌پێ ژ بۆی کوردان چییە؟ ئەم دکارین بێژین کو ئه‌ڤ بێدەنگییا هه‌ده‌پێ ژ بۆی کوتوم بێدەنگییە ل همبەری پەرچەکرنا کوردستانێ و بێدەنگییە ل همبەری داگیرکرنا کوردستانێ.