ئۆپەراسیۆنەکا نوو یا لەشکری ترکیێ ب ناڤێ “ئەرەن زڤستان-4” دەستپێ کر

ئۆپەراسیۆنەکا نوو یا لەشکری ترکیێ ب ناڤێ"ئەرەن زڤستان-4" دەستپێ کر

ئۆپەراسیۆنێن ئارتێشا ترکیێ ل ناڤچە و پارێزگەھێن جودایێن باکورێ کوردستانێ بەردەوامن. وەزارەتا کارێن ناڤخوەیی یا ترکیێ راگھاند کو ل سینۆرێ پارێزگەھا جۆلەمێرگێ ئۆپەراسیۆنەکە نوو ب ناڤێ “ئەرەن زڤستان-4” دەستپێ کر.

ل گۆر داخویانیا کو ئیرۆ سێشەمبێ 16ێ مژدارا 2021ێ ژ ئالیێ وەزارەتا ناڤخوەیا ترکیێ ڤە ھاتیە بەلاڤکرن، ئۆپەراسیۆنێ ڤێ سبێ ب ناڤێ “ئەرەن زڤستان-4” ب بەشداربوونا 1240 لەشکەرێن سەر ب فەرمانداریا جەندرمە و گوندپارێزان دەستپێ کریە.

ب ھاتنا دەمسالا زڤستانێ ل ناڤ ترکیێ ئۆپەراسیۆنێن “ئەرەن زڤستان” دژی گەریڵایێن پەکەکێ دەستپێ کرنە. ئۆپەراسیۆنا “ئەرەن زڤستان-1” رۆژا 9ێ جۆتمەھا 2021ێ ل دەڤەرا بەستایا سینۆرێ پارێزگەھا شرنەخێ ب بەشداربوونا 1550 چەکدارێن ھێزێن سەر ب فەرمانداریا جەندرمە، پۆلیسێن تایبەت، کۆماندۆ و گوندپارێزان دەستپێ کر کو ژ 121 تیمێن جودا پێک ھاتنە.

ئۆپەراسیۆنا “ئەرەن زڤستان-2 ئامانۆس” رۆژا پێنجشەمێ 11ێ مژدارا 2021ێ ل دەڤەرا ئامانۆسا سینۆرێ پارێزگەھا ھاتایێ یا ترکیێ ب بەشداربوونا 718 چەکدارێن ھێزێن سەر ب فەرمانداریا جەندرمەیا ئەدەنێ، پۆلیسێن تایبەت، کۆماندۆ و گوندپارێزان دەستپێ کر، کو ژ 62 تیمێن جودا پێک دھات.

ئۆپەراسیۆنا “ئەرەن زڤستان-3” رۆژا دوشەمبێ 15ێ مژدارا 2021ێ ل سینۆرێ پارێزگەھێن ئامەد و چەولیگێ یێن باکورێ کوردستانێ ب بەشداربوونا 2 ھەزار و 103 چەکدارێن ھێزێن سەر ب فەرمانداریا جەندرمە، پۆلیسێن تایبەت، کۆماندۆ و گوندپارێزان دەستپێ کربوو.

ل گۆر داخویانیا وەزارەتا ناڤخوەیا ترکیێ، ئۆپەراسیۆنا ئیرۆ سێشەمبێ 16ێ مژدارێ، ب ناڤێ “ئەرەن زڤستان-4” ب بەشداربوونا 1240 لەشکەرێن سەر ب فەرمانداریا جەندرمە و گوندپارێزان دەستپێ کریە کو ژ 80 تیمان پێک دهێت.

ئۆپەراسیۆنێن ترکیێ ل ناڤ وی وەلاتی زێدەیی چار مەھە ب ناڤێ ئۆپەراسیۆنێن “ئەرەن” ل 15 ناڤچەیێن جودایێن سینۆرێ پارێزگەھێن ئامەد، مێردین، دێرسم، شرنەخ، جۆلەمێرگ، ئاگری، بەدلیس، ئیدر، قەرس، ئەردەخان و چەند ناڤچەیێن دی یێن باکورێ کوردستانێ دەستپێ کرنە.