ھەڤدەم ل گەل گەفێن ئەنجامدانا ئۆپەراسیۆنەکا لەشکەری ژ ئالیێ تورکیێ و کۆمێن چەکدار ڤە ل سەر باژار و باژارۆکێن رۆژئاڤایێ کوردستانێ، و بانگێن یەکرێزیا ناڤمالا کوردی دا کو ئەو گەف نەمینن و سینارۆیێن عەفرین و سەرێ کانیێ دوبار نەبن، چەکدارێن پەیەدێ تەڤلیھەڤیێ دکەن و گرژی و ناکۆکیان د ناڤا جڤاکا کوردی ل رۆژئاڤایێ کوردستانێ زێدەتر و کووتر دکەن.
ژ بلی کو بەریا دەمەکێ چەکدارێن پەیەدێ گەف ل مالباتێن ھێزێن پێشمەرگەیێن لەشکەرێ رۆژ کرن کو دڤێت کورێن وان ژ ناڤا رێزێن پێشمەرگەیێن لەشکەرێ رۆژ بەردەن، جارەکا دی گەفێن خوە نوو کرن.
ئارک تیڤی ژ ژێدەرەکێ هایدار ڤەگوهاست کو چەکدارێن پەیەدێ ل گوندێ دێرۆنا قولنگا یێ سەر ب ناڤچەیا گرکێ لەکێ یا دێرکا رۆژئاڤایێ کوردستانێ ڤە جارەکا دی گەڤ ل دەھان مالباتێن ھێزێن پێشمەرگەیان کرن و ئەو مالبات ڤەخواستنە دەزگەھێن خوە و فشار ل وان کرنە کو دڤێت کورێن وان دەست ژ پێشمەرگاتیێ بەردەن.
ھەمان ژێدەری بال کشاند سەر وێ یەکێ ژی کو 30 مالبات ژ گوندێ ناڤبووری راستی گەفان ھاتن کو کورێن وان د ناڤ پێشمەرگەیێن لەشکەرێ رۆژ دا نەمینن.
د ڤێ دەربارێ دا، فێسەل یووسف ئەندامێ دەستەیا سەرۆکاتیا ئەنەکەسێ د دەما بەشداریا خوە د بولتەنا ئارکێ دا پشتراست کر کو گەفێن ل سەر مالباتێن پێشمەرگەیان بەردەوام دکەن.
د 9ێ مژدارێ دە، دەستەیا سەرۆکاتیا ئەنەکەسێ داخویانیەک بەلاڤ کر و تێ دا راگھاند کو جڤینەک لگەل دێڤید براونشتاین دا ئەنجام دایە و تێ دا تەکەز کرن کو مالباتێن ھێزێن پێشمەرگەیێن لەشکەرێ رۆژ ب بەردەوامی تووشی گەفێن پەیەدێ تێن، دا کو کورێن خوە ناچار بکەن ژ ناڤا رێزێن پێشەرگەیێن رۆژ دەرکەڤن.
