لایەنگرێن پەکەکێ “رێبەرا توندووتووژیێ” ددەنە خوەندکاران
چەند رۆژن ئالیگرێن پارتیا کارکەرێن کوردستانێ (پەکەکێ) ل بن ناڤێ “تەڤگەرا ئازادی” رێبەرەک ژ بۆ ئاراستەکرن و فێرکرنا رووبرووبوونا ھێزێن ئەولەھیێ ئامادە کرنە و ددەنە خوەندکارێن کو ژ بۆ ھندەک داخوازێن خوە، خوەپێشاندانێ ئەنجام ددەن.
بەلاڤۆک ب سەرناڤێ “رێبەرا خوەپێشاندەر” ب رەنگێ سۆر ھاتیە چاپکرن و د بەلاڤۆکێ دا دهێتە گۆتن: “ھەر دەما ئەم دچینە خوەپێشاندانەکێ ب ھەمان رێیێن وی سەردەمی دچین و ب رادەیەکێ لڤ و تەڤگەرێن مە دوبارە دبن. ئەم باش دزانین کو ئەم دێ چەند شەھیدێن دی ژی دەین و ھەر وەسا ژی بوویە، ئەڤە ژ بلی وێ یەکێ د ئاستا پراکتیک و راستیێ دا داخوازێن مە نایێن جێبەجێکرن و وەکە خوە مانە.”
د رووپەلا 11ێ یا بەلاڤۆکێ دا ھەردو نڤیسکارێن نەناس ھەول دانە خۆرتان، ب تایبەتی خوەندەکاران ھان بدەن و دەستھلاتا خوەمالی و ھلبژارتی وەکە نەیار و ل دژی داخوازا خوەپێشاندەران ب ناڤ دکەن و دبێژن: “ھەر دەم دەستھلات ب ئاوایەکی درندانە لگەل خوەپێشاندەران تەڤدگەریت و وەکە کەسێن ژ کۆنترۆلێ دەرکەتی و دڤێت بهێنە کۆنتۆلکرن دحەسبینیت، چ ب رێیا ئازاردانا وان ب گازا رۆندکرژ بیت، چ ب رێیا دەستەسەرکرنا وان بیت، چ ب رێیا بەلاڤکرنا وان و چ ب رێیا کوشتنا وان بیت.”
د رووپەلا 13ێ دا خوەندکاران ھان ددەن کو ل دروستکرنا رێخستنا نەیاسایی و دەرکەتنا ژ یاسایان بفکرن و ھاتیە گۆتن: “خوەرێخستنکرن یەک ژ خالێن ھەری گرنگ یێن نەرازیبوونێ یە، دڤێت وەلاتیێن بەشدار، ب شێوازێ ب ھەڤ را و ب سینگەکێ بەرفرەھ کار ل سەر بکەن و ب ھەماھەنگیێ تۆرەکا بەرفرەھا رێخستنی دروست بکەن.”
د رووپەلا 14ێ دا خۆرتان ھان ددەن کو ژ بۆ خوەپێشاندانێ مولەتێ وەرنەگرن و دبێژن: “دەستوورا خوەپێشاندانێ، یەک ژ بەهانەیێن بھێزێن دەستھلاتا حکومرانە ل ھەمبەر خوەپێشاندەران. پرسیارا سەرەکی ئەوە کو گەلۆ پێویستیا من ب مولەتێ ھەیە ژ بۆ رێکخستنا نەرازیبوونا جەماوەری؟ ب کورت و کورمانجی؛ نە، چمکی تو ب عەسلێ خوە ژ ڤێ دەستھلاتێ عاجزی، کو چەندین سالن گەندەلیێ دکەت و مافێن خەلکێ دخوەت و تە دچەوسینیت، بێگومان مولەتێ ژی نادەتە نەرازیبوونێ، کو ل دژی بەرژەوەندیێن خوە بیت و گەف بیت.”
ل ھەرێما کوردستانێ ژ بەر پەیوەندیێن جڤاکی و سرووشتا جوگرافی، گەلەک ژ کارمەندێن ئەولەهیێ و چالاکیێن سڤیل، کەسووکار و خزم و دۆستێن خوەپێشاندەرانن و کارمەندێن ئەولەھیێ خوەپێشاندەران دپارێزن و خوە وەکە دلسۆزێن پاراستنا ژیان و سەلامەتیا خوەپێشاندەران دبینن.
