وەزارەتا پێشمەرگە راگەھاند، ئیرۆ شاندەکا وەزارەتا بەرەڤانیا بریتانیا کو پێک ھاتبوو ژ جەنەرال پیتی ستیت و جەنەرال جۆلس سالۆسبۆری، سەردانا وەزارەتێ دا و ژ ئالیێ شێورمەندێ بلندیێ وەزارەتێ جەنەرال ھەژار عومەر ڤە ھات پێشوازیکرن.
وەزارەتێ دایە زانین ژی، د جڤینێ دا کو شێورمەندێ سەربازی یێ کۆنسولخانەیا بریتانیا ل ھەولێرێ، مایک دیکسۆن ژی ئامادە بوو، بەحسا خەباتێن چاکسازیێ ل وەزارەتا پێشمەرگە و رۆلا بریتانیا و ھێزێن ھەڤپەیمان د وێ پرۆسەیێ دا ھات کرن.
د داخویانیا وەزارەتا پێشمەرگە دا ھاتیە گۆتن ژی، د جڤینێ دا رەوشا ئەولەھیا ئیراقێ و پێکئانینا ھێزا ھەڤبەش د ناڤبەرا پێشمەرگە و ئارتێشا ئیراقێ دا و دیالۆگا ستراتەژیک د ناڤبەرا ئیراق و ئامەریکا دا و پێشخستنا پێوەندیێن وەزارەتا پێشمەرگە و وەزارەتا بەرەڤانیا بریتانیا ژی ھاتن ئاخافتن.
