پۆلیتبورۆیا پارتیا دەمۆکراتا کوردستانێ (پەدەکی) داخویانیەک دەربارێ ئەنجامێن ھلبژارتنێن پێشوەخت یێن ئیراقێ دا راگھاند.
د داخویانیا پۆلیتبورۆیا پەدەکێ دا ھات: “پرۆسەیا ھلبژارتنا پێشوەختا ئەنجوومەنا نوونەران یا ئیراقێ یا رۆژا 10/10/2021 ھاتیە کرن، ب پاکی و دەمۆکراسیانە برێڤە چوو، ھەتا وێ دەما کو بریارا سیاسی و دەستێوەردانا سەرۆککۆمار و سەرۆکێ دەستەیا دادوەری ب ئاوایەکی نەیاسایی دەما تانەدانێ درێژ کر، ب مەبەستا دەستکاری د ئەنجامان دا ل گۆر بەرژەوەندییا ھندەک ئالییێن دیارکری بهێتە کرن.”
پۆلیتبورۆیا پەدەکێ راگھاند، “پشتی کو کۆمیتا یاسایی و تەکنیکی یا پارتیا مە لگەل کۆمسیۆنا بلندا سەربخوەیا ھلبژارتنان و دەستەیا دادوەریێ جڤیا، ب بەلگەھان ھات تەکەز کرن کو بنپێکرن ھاتنە کرن، ژ بەر وێ ئەم د پارتیا دەمۆکراتا کوردستانێ دا، ڤان دەستێوەردانا، گوھارتن و بنپێکرنان رەد دکەین و بەرەڤانیێ ل مافێن کاندید و دەنگدارێن خوە دکەین و ب پێویستی ژی دزانین کو مافێن خوەیێن دەستەسەرکری ڤەگەرینن، ژ ڤێ رەوانگەھێ ڤە، ژ بۆ دادپەروەری و ڤەگەراندنا مافان ژ بۆ خوەدیێن مافان، ئەم ب رێکارێن یاسایی د ھەولێن خوەیێن ژ بۆ ڤەگەراندنا وان مافان و نەھیشتنا بنپێکرنان بەردەوام دبین و پێنگاڤێن خوەیێن داھاتی ژی ئەم دێ د دەما خوە دا راگەھینین.”
رۆژا 30 مژدارا بۆری کۆمسیۆنا بلندا سەربخوەیا ھلبژارتنان ناڤێن تەڤاھیا کاندیدێن سەرکەفتی ژی بەلاڤ کرن، بەردەڤکێ پەدەکێ مەحموود محەمەد د وێ دەربارێ دا راگھاندبوو، دو کورسیێن کو ژ مافێ کاندیدێن پەدەکێ بوون، ب تالانی ھاتنە برن.
