سێ باژارێن رۆژهلات هەڤپەیمانییەکێ ل گەل هەرێما کوردستانێ پێک تینن

كوردستان-رۆژهلات-east-kurdistan

پارێزگارێ نوو یێ سنە راگهاند کو پارێزگه‌هێن سنە، کرماشان و ئورمیێ هەڤپەیمانیەکا نوو یا ئابووری ل گه‌ل هه‌رێما كوردستانێ پێک تینن ژ بۆ كو بازرگانییا ل نێڤبه‌را وان دا بهێته‌ زێده‌كرن.

پارێزگارێ سنە ئیسماعیل زاری کوشا رۆژا شەمبیێ 4/12/2021ێ د جڤینەکێ دا ل گەل بەرپرسێن رێخستنا پێشەسازی و بازرگانی یا سنە دا گۆت: «ئەو هەڤپەیمانییا ئابووری یا ناڤبەرا پارێزگەهێن سنە، کرماشان و ئورمیێ ل ده‌مه‌كێ نێزیک دێ هێته‌ بجهئینان».

ل گۆر ئیسماعیل زاری کوشا، ب رێیا وێ هەڤپەیمانییا ئابووری دێ پلانێن باشتر هێنه‌ دانان و تەڤگەرا بازرگانی ل گەل هەرێما کوردستانێ دێ زێدەتر لێ كه‌ت، 3 دەریێن ناڤدەولەتی و 4 دەریێن نیڤ فەرمی یێن پارێزگەهێن سنە، کرماشان و ئورمیێ یێن رۆژهلاتێ کوردستانێ ل گەل هەرێما کوردستانێ هەنە و سالانە ب بهایێ نێزیکی 6 ملیار دۆلاران ب رێیا وان دەریێن سنۆری بازرگانی ل گەل هەرێما کوردستانێ دهێته‌ کرن.

پارێزگارێ سنه‌ گۆت ژی: تەنێ بەشەک ژ وان کەلوپەلێن د دەریێن سنۆری را بۆ هەرێما کوردستانێ دهێنه‌ هاوردە کرن، بەرهەمێن پارێزگه‌هێن سنە، کرماشان و ئورمیێ یێن رۆژهلاتێ کوردستانێ نە، بەرپرسێن وان هەرسێ پارێزگەهان هەردەم بازارێن هەرێما کوردستانێ وەک دەرفەتەک بۆ بەرهەمێن خوە دیتینە.