رێخستنا په‌كه‌كێ ئێڤارا دوهی ب رێیا سه‌دان كه‌سێن عه‌ره‌ب و چه‌كدارێن رێخستنا «جوانێن شۆره‌شگه‌ر» یا گرێدای جه‌میل باییك ل رۆژئاڤا كوردستانێ، هێرشی ده‌ریێ پێشابوورێ كرن و هه‌ژماره‌كا پاسه‌وانێن وێ خالا سینۆر بریندار كرن.
رێخستنا په‌كه‌كێ ئیرۆ رۆژا پێنجشه‌مبێ 16\12\2021ێ داخویانی دایه و وه‌كه هه‌رجار هێرش برنه سه‌ر په‌ده‌كێ و حكوومه‌تا باشوور و گۆتییه كو په‌ده‌كێ ده‌ریێ سینۆر گرت ژ بۆ كو دوورپێچێ بێخیته سه‌ر گه‌لێ رۆژئاڤا! ئه‌ڤ ل ده‌مه‌كی دهێت، ئێڤارا دوهـی رۆژا چارشه‌مبێ 15\12\2021ێ رێخستنا په‌كه‌كێ ب رێیا سه‌دان كه‌سێن عه‌ره‌ب كو ژ دێركێ و قامشلۆیێ ئینا بوون سێمالكا، هه‌روه‌ها چه‌كدارێن رێخستنا «جوانێن شۆره‌شگه‌ر» یا گرێدای جه‌میل باییك ل رۆژئاڤا كوردستانێ، هێرشی ده‌ریێ پێشابوورێ كرن و هه‌ژماره‌كا پاسه‌وانێن وێ خالا سینۆر بریندار كرن.
پاش ڤێ هێرشێ رێڤه‌به‌رییا ده‌ریێ پێشابوورێ داخویانی دا و راگه‌هاند كو رێخستنا په‌كه‌كێ ژ بۆ كو تێكدانێ بكهت، ره‌وشا باشوورێ كوردستانێ خراب بكهت و هه‌روه‌ها زرارێ ل گه‌لێ رۆژئاڤا بكهت ئه‌ڤ هێرش برن سه‌ر ده‌ریێ پێشابوورێ.
برێڤه‌به‌رێ ده‌ریێ پێشابوورێ شه‌وكه‌ت به‌ربوهاری هه‌روه‌ها گۆت: ده‌ریێ پێشابوورێ تاكه رێیا دابینكرنا ده‌بارا ژیانا خه‌لكێ مه یێ خۆشه‌ویسته ل رۆژئاڤا كوردستانێ، په‌كه‌كێ ژی ب ڤێ هێرشێ دخوازیت زیانێ ل وان بكهت و به‌رژه‌وه‌ندیێن وان بێخیته خه‌ته‌ریێ.
هه‌روه‌ها گۆتبوو كو په‌كه‌كه ژ گرتنا ده‌ریێ سینۆر به‌رپرسه.
لێ به‌لێ ئیرۆ په‌كه‌كه هاتییه و دیسا د مه‌دیایا خوه دا دره‌و به‌لاڤ كرنه و گۆتییه كو په‌ده‌كه بێی كو چ داخویانییه‌كێ بده‌ت، ده‌ریێ سینۆر گرتن و هه‌روه‌ها گۆت كو په‌ده‌كێ ئه‌ڤ یێك ئه‌نجام داییه ژ بۆ كو دوورپێچێ بێخیته سه‌ر گه‌لێ رۆژئاڤا!.
رێخستنا په‌كه‌كێ ئه‌ڤ ده‌ما سێ مه‌هانه دو خیڤه‌ت ل ده‌ریێ سێمالكا دانانه و ب دارێ زۆرێ خه‌لكێ رۆژئاڤا ل وێرێ كۆم دكه‌ت و ب هاڤێتنا سلۆگانێن ل دژی هه‌رێما باشوورێ كوردستانێ وان هان دده‌ت كو هێرشا ده‌ریێ سینۆر بكه‌ن.
ئه‌ڤ یێك ژی دوهی ل به‌ر چاڤێن مه‌دیایێ و گه‌لێ كوردستانێ چێبوو وه‌ختا په‌كه‌كێ ب رێیا ب سه‌دان جوانێن عه‌ره‌ب كو هه‌موو ژ دێركێ و قامشلۆیێ ئینا بوون، هێرش ب كه‌ڤر و مۆلۆتۆفان برن سه‌ر ده‌ریێ پێشابوورێ و هه‌ژماره‌كا پاسه‌وانیێن ده‌ریێ پێشابوورێ بریندار كرن.
په‌كه‌كێ هه‌م هێرش كر و هه‌م ژی بوو سه‌ده‌ما گرتنا ده‌ریێ سینۆر و پشتره تێ و ب روو قایمی دبێژیت په‌ده‌كێ ئه‌ڤ یێك ئه‌نجام داییه.
