پارێزگارێ هەولێرێ ئۆمێد خۆشناو د کۆنفەرانسەکا رۆژنامەڤانی دا، زیانێن لەهییا بەری دو رۆژان یا ل چەند تاخ و ناڤچەیێن هەولێرێ دیار کرن و راگه‌هاند، 12 کەسان ژیانا خوە ژ دەست دان و زیانێن مادی ژی ب 21 ملیار دینار تێن تەخمینکرن.
پارێزگارێ هەولێرێ گۆت: «شەڤا17/12/2021ێ، ل 15 جهێن هەولێرێ لەهی رابوو، د ئەنجامێ دا 12 کەسان ژیانا خوە ژ دەست دان، تەرمێ 12 کەسان گه‌هشتنه نۆشدارییا دادوەری و رادەستی کەسووکارێن وان هاتن کرن».
دیار کر ژی: «قوربانی 3 کوردێن هەولێرێ، کوردەکێ ئێزدی، 3 کەسێن عەرەب، دو کەسێن نیپالی بوون، کەسەک ب ناڤێ ئۆمێد شامل و زارۆکەک ب ناڤێ دانەر نەبەز به‌رزه‌نه».
پارێزگارێ هەولێرێ گۆت: «د لەهیێ دا، ئاڤ دەرباسی 2509 خانییان بوو و زیان گه‌هشت 402 خانیێن دن کو یان دیوارێن وان تێک چوون یان ژی دەر و پەنجەرێن وان تێک چوونه، زیان گه‌هشت 867 ئۆتۆمۆبیلان، 153 دکان، مارکێت، کارگەهـ، پێشانگەهێن ئۆتۆمۆبیلان زیان دیتنه، هەروه‌ها زیان گه‌هشت هەژمارەکا زەڤیێن چاندنێ و ئاژالداریێ».
ئۆمێد خۆشناو راگه‌هاند، «زیانێن مەزن گهیشتن رێ و پران، تۆرا ئەلکتریکێ و ئاڤێ، خواندنگه‌هـ و ئاڤاهیێن حکوومی، هەروه‌ها زیان گه‌هشت بەنداڤێن بچووک».
پارێزگارێ هەولێرێ دیار کر: «ب گشتی، زیانێن لەهیێ ب 21 ملیار دینار تێن تەخمینکرن».
پارێزگارێ هەولێرێ بانگ ل حکوومەتا فەدەرالی کر، «ب بودجەیا هاوارهاتنێ، پشتەڤانییا هەرێما کوردستانێ و هەولێرێ بکەت، ژ بەر کو ئەو مافەکی مەیێ یاسایی یە، ژ بۆ كو ئەم زیانپێکەتییان قەرەبوو بکه‌ین».
