د پێتری 40 سالێن شه‌رێ په‌كه‌كێ و تركیێ دا، ته‌رمێن پێتری 1000 شێنیێن كورد، ژ هێلا تركیێ ڤه ل گۆرستانێن بێ ناڤ و نیشان هاتنه بن ئاخ كرن.
مه‌دیایا باكورێ كوردستانێ چه‌ندین راپۆرت د ڤێ ده‌ربارێ دا چێكرنه و هاتییه ته‌سبیت كرن كو كوردێن د شه‌رێ په‌كه‌كێ و تركیێ دا ژیانا خوه ژ ده‌ست دانه، بێی كو مالباتێن وان بێن هایدار كرن، د گۆرستانێن بێ ناڤ و نیشان دا، هاتنه بن ئاخ كرن.
د راپۆرتێن مه‌دیایێ دا هاتییه: بانگا مالباتێن قوربانییان ژی ژ بۆی ته‌ستا DNA ژ بۆ كو ته‌رمێن ئه‌ولادێن وان بێن ناس كرن، بێ به‌رسڤ مانه.
گۆرستانا گارزان یا ل گوندێ «ئولكا جور» كو ل ناڤه‌ندا به‌دلیسێ یه، ل 19 دیسامبه‌را 2017ێ هات خه‌راب كرن، ته‌رمێن كو ل وێرێ بوونه هه‌موو ب شه‌فه‌لان هاتن ده‌رخستن، 282 ته‌رم ل كیلیۆسا ناڤچه‌یا سته‌نبۆلێ هاتن ڤه‌شارتن و د 4 سالێن رابووری دا ته‌نێ 21 ژوان ب مالباتێن وان هاتنه راده‌ست كرن.
سیمووس كارداغ، هه‌ڤسه‌رۆكێ ئه‌نجوومه‌نا «هاریكاری و یه‌كگرتن» ل گه‌ل مالباتێن قوربانییان ب مه‌دیایێ گۆتنه: وه‌ك گۆرستانا كیلیۆسا سته‌نبۆلێ، هه‌ری كێم 1000 ته‌رم د گۆرستانێن نه‌ناس كری دا ل سێرتێ، مێردینێ، رهایێ، ئه‌ده‌نه، شره‌نه‌خێ، ئامه‌د و باتمانێ هاتنه بن ئاخ كرن.
ده‌ست نیشان كر، گه‌له‌ك جاران وان بانگا وه‌رگرتنا ته‌رمێن خوه كرنه، لێ به‌لێ ئه‌ڤ داخوازییا وان بێ به‌رسڤ مانه.
ڤه‌شارتنا نووچه‌یێن مرنا كوردان، سیاسه‌ته‌كه نه ته‌نێ ژ هێلا تركیێ ڤه دهێته بكارئینان، لێ به‌لێ په‌كه‌كه هه‌مئاوایێ تركیێ، مرنا شه‌رڤانێن خوه ڤه‌دشێریت، یان ژی ب سالان ده‌م دچیت هه‌تا كو هنده‌ك هه‌ژمارێن نه‌راست رادگهینیت.
