دایرەیا پەیوەندیێن دەرڤە یا رێڤەبەریا خوەسەرا ل رۆژئاڤایێ کوردستانێ راگھاند کو ل باژارێ قامشلۆ جیگرێ ھەڤسەرۆکاتیا دایرەیێ فەنەر ئەل-گێت و ئەنداما دەستەیا رێڤەبەر سەنا دەھا پێشوازی ل شاندەکێ وەلاتێ سوودانێ کر.
ھات دیارکرن کو شاندا سوودانی ژ بەرپرسێ کارووبارێن بالیۆزخانەیا سوودانێ یا ل شامێ تارق عەبدوللا، شێورمەندێ بالیۆزخانەیێ عیمادەدین ئەحمەد و گەریندەیێ بالیۆزخانەیێ پێک ھاتبوو.
ھات گۆتن کو د ھەڤدیتنێ دا ل سەر مژارێن سیاسی، ئابۆری و ب تایبەت رۆلا عەرەبی د چارەسەرکرنا ئالۆزیا سووریێ دا گوفتووگۆ ھاتیە کرن.
ل گۆری داخویانیا دایرەیا پەیوەندیێن دەرڤە، ئەل-گێت گۆتیە، “ئەم ب ھێڤی نە کو خەباتێن ژ ئالیێ دەولەتێن عەرەبان ڤە تێنە کرن هاریکاریا چارەسەرکرنا ئالۆزیا سووریێ بکەت. بەرۆڤاژی رۆلا ھندەک دەولەتێن ھەرێمی وەکی ترکیا و ئیرانێ کو رۆلەکێ نەرینی دگێرن و ئالۆزیا سووریێ کوورتر دکەن.”
ھەروھا ھات راگھاندن کو ھەر دو ئالیان د ھەڤدیتنێ دا ژ بلی رەوشا ئەولەھیا کامپێن ھۆلێ و رۆژ یێن مالباتێن داعشێ رەوشا مرۆڤی یا ھەرێمێ، دۆسیایا کۆچبەر و پەنابەران ژی گۆتووبێژ کرن.
