پێشمەرگەیەکێ ئێزدی ب ناڤێ سەعید مراد قاسم ژ بەر بلندکرنا ئالایێ کوردستانێ ل سەر بانێ مالا خوە ژ ئالیێ چەکدارێن پەکەکێ ڤە هاتیە رەڤاندن و هەیا نها چارەنڤیسا وی نەدیارە.
چاڤکانیێن پێگەها دارکا مازی ل باشوورێ کوردستانێ ئاشکەرا کر، سەعید مراد ل رۆژا 13/9/2021ێ ل دەما سەرەدانا مالا خووشکا خوە ل گوندێ بورەک کری، ل زالگەها چەکدارێن پەکەکێ ل سەر جاددەیا سەرەکی هاتیە رەڤاندن و هەیا نها ژی چارەنڤیسا وی نەدیارە و چ ئالیەکێ ژی بەرپرساتیا خوە ل سەر ڤێ مژارێ رانەگهاندیە.
تەڤی کو مالباتا وی دزانن سەعید ژ ئالیێ چەکدارێن پەکەکێ ڤە هاتیە رەڤاندن ژی، لێ بەلێ، چ ئالیەک ب رەڤاندنا وی سووچبار نەکریە و ب تەنێ گلی تۆمارکریە، مالباتا سەعید ژ بەر پاراستنا جانێ کورێ خوە نە پۆلیسێن شەنگالێ و نە ژی هیچ هێزەکا ئەولەکاریێ ل شنگالێ ل سەر ڤێ یەکێ ئاگەهدار نەکرینە، ژ بەر کو دترسن ب ڤێ یەکێ چەکدارێن پەکەکێ کورێ وان د بن ئیشکەنجەیێ دا تەرۆر بکن.
ل گۆر ئاگاهیێن ب دەست پێگەها دارکا مازی کەتی، سەعید ل نەڤرۆزا سالا 2021ێ ئالایێ کوردستانێ ل سەر بانێ مالا خوە ل کامپا سەردەشتێ بلندکریە، ئەڤ یەک ژی بوویە سەدەما نەرازیبوونا چەکدارێن پەکەکێ و ژ وی خواستینە ئالایێ کوردستانێ ل سەر بانێ مالا خوە بینیت خوارێ، لێ بەلێ، ژ بەر کوردپەروەریا خوە سەعید رازی نابیت ئالایێ کوردستانێ بینیت خوارێ، ئەڤ یەک ژی دبیتە سەدەما دروست بوونا ناکۆکیێ د نێڤبەرا چەکدارێن پەکەکێ و سەعید دا، سەعید بۆ دەما سێ رۆژان، ئانکو هەیا ب داوی بوونا هەر سێ رۆژێن نەورۆزێ ئالایێ کوردستانێ ل سەر بانێ مالا خوە نەئانیە خوارێ.
برایێ سەعید یێ ب ناڤێ ئێزدین، ل دادگەها باژارۆکێ سنۆنێ ل سەر رەڤاندنا برایێ خوە ژ ئالیێ پەکەکێ ڤە سکالا تۆمار کریە، و فەرماندەیا لیوایا 5 یا سەنگەر، فەرمانا پێک ئانینا لیژنەیەکا لێکۆلینێ ل سەر مژارا رەڤاندنا سەعید دەرکریە و ژ بۆ فەرمانگەها یاسایی یا سەر ب فەرماندەیا زێرەڤانی شاندیە.
سەعید مراد قاسم، کوردەکی ئێزدی ژ هۆزا فەقیرە، ل سالا 1995ێ ژ داییک بوویە، ناڤێ داییکا وی هلۆ سەیدۆ مشکۆ یە، خەلکێ باژارۆکێ گرعزێر یێ سەر ب شنگالێ یە، ئەو نیشتەجیێ گوندێ گابار یێ سەر ب هەمان باژارۆکی بوو، د یەکینەیێن بەرخوەدان یا سەر ب لیوایا 5ێ سەنگەر یا سەر ب فەرماندە یا زێرەڤانی پێشمەرگەیە.
