ڤەگەراندنا تەرمێن کۆچبەرێن کورد ھات پاشخستن

ڤەگەراندنا تەرمێن کۆچبەرێن کورد ھات پاشخستن

بەرپرسەکێ حکوومەتا کوردستانێ راگەھاند، ڤەگەراندنا تەرمێن وان کۆچبەرێن کورد یێن کو د ناڤبەرا فرانسا و بریتانیا دا خەنقیبوون، ھات پاشخستن.

شێورمەندێ فەرمانگەھا پەیوەندیێن دەرڤە یا کوردستانێ، ھەلگۆرد سالەیی ژ بۆ کانالا K24ێ گۆتیە، بریار بوو ئیرۆ تەرمێن 16 کۆچبەرێن کوردیێن خەلکێ ھەرێما کوردستانێ کو د ناڤبەرا فرانسا و بریتانیا دا خەنقیبوون، ڤەگەرینن کوردستانێ لێ ژ بەر رەوشا خراب یا ھەوایێ ھات پاشخستن.

ھەلگۆرد سالەیی دایە زانین ژی، فرۆکەیا کو دێ تەرمان ڤەگوھەزیت ھەولێرێ، دێ ئیشەڤ دەمژمێر 01:00 کەڤیتە رێ.

رۆژا 24 مژدارا سالا 2021 بەلەمەکا کۆچبەران ل ناڤ ئاڤا کانالا مانش، کو دکەڤیتە ناڤبەرا فرانسا و بریتانیا، کەتبوو بنێ ئاڤێ و ژ 33 کۆچبەران تەنێ 2 کەس رزگار ببوون.

د ناڤ یێن خەنقی دا، 16 کەس خەلکێ ھەرێما کوردستانێ بوون.