16 تەرمێن کۆچبەرێن د کەنالا ئینگلیز دا خەندقیبوون، ئیرۆ دانێ سبێ ب رێیا فرۆکخانەیا ناڤدەولەتی یا هەولێرێ گههشتن هەرێما کوردستانێ.
رۆژا 24 مهها 11 یا ئیسالێ 2021ێ، بەلەما کۆچبەران د کەنالا ئینگلیز «دەریایا ناڤبەرا فرانسا و بریتانیایێ» دا بناڤ بوو و تێدا هەژمارەک ژ کۆچبەرێن کورد خەندقیبوون.
پێشتر بەردەڤکێ حکوومەتا هەرێما کوردستانێ جۆتیار عادل راگههاندبوو، ل سەر ئەرکێ سەرۆکوەزیرێ هەرێما کوردستانێ مەسروور بارزانی، دێ تەرمێن وان قوربانییان دێ هێنه ڤەگەراندن.
ڤەگەراندنا تەرمان ژ بەر پرۆسەیا دیارکرنا ناسنامەیا قوربانییان دەرەنگ کەت کو ب هەماهەنگییا د ناڤبەرا ئۆفیسا سەرۆکوەزیر، وەزارەتا ناڤخوە، فەرمانگەها پهیوەندیێن دەرڤە و نوونەرێ حکوومەتا هەرێمێ ل فرانسایێ هات کرن.