رێخستنا په‌كه‌كێ، شه‌هاده‌تا 6 ژنێن كورد راگهاند كو ل رۆژێن رابووری ل مێردینێ یا باكورێ كوردستانێ د ئۆپه‌راسیۆنا «ئه‌ره‌ن – زڤستان» ده، ژ هێلا ئارتێشا تركیێ ڤه هاتنه ئارمانج گرتن، یێك ژوان ژنان «هیرا ئولاش» بوو، ئه‌و فه‌رماندارا «یه‌ژا – ستارێ» بوو.
په‌كه‌كه، هه‌ر ل ناڤبه‌را دو هه‌یا 3 رۆژان، ناسنامه‌یا كۆمێن زارۆك، كه‌چ و جوانێن كوردان ئه‌شكه‌ره دكه، یێن كو د به‌رخوه‌دانا خوه یا ساخته دا، به‌رخوه‌دانا «براتییا گه‌لان» ب ده‌ستێ عه‌سكه‌رێ ترك دده كوشتن، هه‌ری داوی شه‌هاده‌تا 6 ژنان راگهاندییه كو ل مێردینا باكورێ كوردستانێ، كه‌تنه به‌ر ئێریشا ئارتێشا تركیێ.
په‌كه‌كێ گۆتییه: یێك ژ وان 6 ژنێن كو ل مێردینێ شه‌هید بوونه، هیرا ئولاشه، فه‌رماندارا یه‌ژا – ستارێ یه، په‌كه‌كێ د په‌سنا هیرایێ دا ب روو قایمی گۆتییه:
«هیرایێ ب روحێ بلند یێ رێبه‌ر ئاپۆ شه‌ر كر، ته‌سلیمنه‌بوو و شه‌هید بوو، وێ بەرخوەدانەکە داستانی نیشان دان و سەکنا تەسلیمنەگرتی یا ژنێن کورد ب رەنگەکی لەهەنگی تەمسیل کر».
په‌كه‌كه وه‌كه چاوا هه‌ر جار، بازرگانیێ ب خوینا كه‌چ و جوانێن كورد دكه، ئیرۆ ژی هاتییه هه‌مان تشت ب خوینا هیرایێ و هه‌ڤریێن وێ دكه و له‌هه‌نگییا وان ژ بۆ «زه‌لامێ ئیمرالیێ» حه‌ساب دكه و دبێژه: «وان ب روحێ ئاپۆیی یێ بلند شه‌ر كر و ته‌سلیمنه‌بوون»!.
لێ به‌لێ، هه‌ر كورده‌‌كێ ب ویژدان دزانه ئاپۆ ب «سه‌مبۆلا ته‌سلیمبوونێ» تێ حه‌ساب كرن، ژ به‌ر كو ئه‌و تاكه سه‌ركرده‌یێ كورده، وه‌ختا كو ل سالا 1999ێ كه‌تییه ده‌ستێ تركان و هێژان زللـه‌هه‌ك ب روویێ وی نه‌كه‌تی ژ ئه‌فسه‌رێن ترك ره گۆتی: «دییا من تركه»!.
هه‌روه‌ها هه‌ر كورده‌ك دزانه ئاپۆ سه‌كنا ته‌سلیمبوونێ چ قاس ب روو ره‌شی و شه‌رمه‌زاری ته‌مسیل كر وه‌ختا ل دادگه‌هێ و د یه‌كه‌م گۆتنا خوه ده ژ دادوه‌ر ره گۆتی: «حه‌ز ژ تركیێ دكم، هه‌گه‌ر هوون ده‌رفه‌تێ بدن ئه‌زێ خزمه‌تا تركیێ بكم»!.
هه‌ر گه‌ریلایه‌كێ د شه‌ر دا ژیانا خوه ژ ده‌ست بده، په‌كه‌كه تێ و شه‌رێ كو وی گه‌ریلای مه‌شاندی، ژ بۆ ئاپۆ حه‌ساب دكه و ب روو قایمی دبێژه «سه‌كنا ئاپۆ، روحێ فه‌دایێ ئاپۆ، له‌هه‌نگی و به‌رخوه‌دانا ئاپۆ» و گه‌له‌ك تشتێن ووسا، په‌كه‌كه دفكره ئه‌و دێ ب ڤی ره‌نگی شه‌رمه‌زارییا رێبه‌رێ خوه، ته‌سلیمبوونا رێبه‌رێ خوه ژ گه‌ل ره ڤه‌شێره یان ژی دێ ژبیرا گه‌ل به!.
