چه‌ته‌یێن تركیێ د سالا 2021ێ دا 726 كورد ژ عه‌فرینێ ره‌ڤاندنه‌

efrin-tawan-turkey

زنجیرەیا تاوان و بنپێکرنێن مافێن مرۆڤان ژ ئالیێ گرووپێن چەکدارێن سەر ب ترکیێ ڤە ل هەرێما عەفرینێ بەردەوامن، د سالا 2021ێ دا ژی، زێدەتر ژ 1200 تاوان و بنپێکرنان هاتنە کرن.

د 20 چلەیا 2018ێ دا ئارتێشا ترکیێ و گرووپێن چەکدارێن سەر ب وێ ڤە هێرشی سەر عه‌فرینێ کرن و پشتی شەرێ 58 رۆژان عه‌فرین هات داگیرکرن، د ئەنجاما داگیرکرنا عه‌فرینێ دا، زێدەتر ژ هەزار وەلاتییان شەهید و بریندار بوون، زێدەتر ژ 350 هەزار وەلاتی ژی ب نەچاری دەربدەر بوونه‌، پشتی 3 سالان ژ داگیرکرنێ ژی، هێشتا تاوان و بنپێکرنێن مرۆڤی بەردەوامن.

ژ ئادارا 2018ێ ڤە، بێ ناڤبەر تاوان و بنپێکرنێن مافێن مرۆڤان ژ ئالیێ گرووپێن چەکداران ڤە هاتنە، وەک رەڤاندن و کوشتنا وەلاتییان، دەستدانانا سەر مال و ملکێن خەلکێ، شەوتاندن و ژناڤبرنا دارێن زەیتوونان و ده‌رامه‌تێن دی، تێکدانا شوونواران، جهێن دیرۆکی و مەزارێن ئێزدییان و گوهارتنا دەمۆگرافیا عه‌فرینێ.

د ڤێ دەربارێ دا، رەوانگەها سووری یا مافێن مرۆڤان راپۆرتەک ل سەر تاوان و بنپێکرنێن مافێن مرۆڤانێن ژ ئالیێ گرووپێن چەکداران ڤە تەنێ د سالا 2021ێ دا هاتنە کرن بەلاڤ کر و دیار کر:

– 129 کەس د ئەنجاما شەر و پەڤچوونێن چەکداران خوە ب خوە دا، تۆپباران و تەقینان دا هاتنە کوشتن، ژ وان 66 کەسێن سڤیل (ژ ناڤا وان 13 زارۆک و 15 ژن)ن و 63 چەکدارن.

– 25 تەقین هاتنە کرن.

– 26 جاران شەر و پەڤچوون د ناڤبەرا گرووپێن چەکداران ب خوە دا دەرکەتییە.

– 726 کەس ژ ئالیێ گرووپێن چەکداران ڤە هاتنە رەڤاندن.

– 168 خانی و دکان ژ ئالیێ گرووپێن چەکداران ڤە هاتنە دەستەسەرکرن.

– 113 زەڤیێن چاندنیێ ژ ئالیێ گرووپێن چەکداران ڤە هاتە دەستەسەرکرن.

– 78 خانیێن کۆچبەرێن عه‌فرینێ ژ ئالیێ گرووپێن چەکداران ڤە هاتنە فرۆتن.

– 106 پرۆسەیێن «فەرزکرنا باجان» ژ ئالیێ گرووپێن چەکداران ڤە هاتنە کرن.