ھەسەدێ ئەنجامێن ئۆپەراسیۆنێن سالا 2021ێ یێن ل دژی داعشێ ئاشکەرا کرن

ھەسەدێ ئەنجامێن ئۆپەراسیۆنێن سالا 2021ێ یێن ل دژی داعشێ ئاشکەرا کرن

ناڤەندا راگھاندنێ یا ھێزێن سووریەیا دەمۆکراتیک (ھەسەدێ) ب داخویانیەکێ ئەنجامێن ئۆپەراسیۆنێن خوە یێن د سالا 221ێ دا ل دژی شانەیێن تەرۆریستێن داعشێ ل رۆژئاڤایێ کوردستانێ و باکورێ رۆژھلاتێ سووریێ ئەنجام دایی، ئاشکەرا کرن.

د داخویانا ناڤەندا راگھاندنێ یا ھەسەدێ دا ھات، “ھەول و فەداکاریا ھێزێن مەیێن د سالا 2021ێ دا ل دژی شانەیێن رێخستنا تەرۆریستی یا داعشێ ل ھەرێمێن باکور و رۆژھلاتێ سووریێ گەلەک سەرکەفتن ب دەست خستن و ھێزێن مە کارین گەلەک ئۆپەراسیۆنێن تەرۆریستی یێن موحتەمەل تێک ببەن. ھەروھا گەلەک پلانێن تەرۆریستان بەریا ئەنجامدانا وان پووچ کرن.”

ھەروھا ھەسەدێ دیار کریە، “ھشیاریا ھێزێن مە بوو سەدەما ئاشکەراکرن و پووچکرنا گەلەک بۆمبە و تەقەمەنیان. ھەروھا گەلەک حەملەیێن پاککرنێ ژ بۆ گرتنا شانەیێن ڤەشارتی یێن داعشێ، ب تایبەتی ل سەر سینۆرێن سووریا-ئیراقێ و ھەرێمێن بیابانێ ھاتن کرن.”

د داخویانیێ دا ئەنجامێن ئۆپەراسیۆنێن کو ھەسەدێ چ یێن ب تەنێ یان ئۆپەراسیۆنێن ھەڤبەشێن لگەل ھەڤپەیمانیا ناڤدەولەتی دا ل دژی داعشێ د سالا 2021ێ دا ئەنجامدای، ئاشکەرا کرن:

– 115 ئۆپەراسیۆنێن ئەولەکاری یێن یەک ئالی و ھەڤبەش ل دژی داعشێ ھاتن ئەنجامدان.

– 93 شانەیێن تەرۆرستی ھاتن ھلوەشاندن.

– 802 ئەندامێن شانەیێن داعشێ، گوومانبار و کەسێن ئالیکاری دانە شانەیێن داعشێ ھاتن دەستەسەرکرن.

– 8 ئەندانێن شانەیێن داعشێ د ئۆپەراسیۆنان دا ھاتن کوشتن.

– 47 ئێریشێن داعشێ بەری ئەنجامدانێ ھاتن پووچکرن.

– 87 بۆمبە و مین ھاتن پووچکرن.

د داویا داخویانیا ھەسەدێ تەکەزی ھاتە کرن کو دڤێت جڤاکا ناڤدەولەتی ئالیکاریا جڤاکا خوەجھی ب تایبەتی د مژارا دوبارە ئاڤەدانکرنا ھەرێمێ دا بکەت. ھەروھا تەکەزی ل سەر وێ یەکێ ژی کر کو ئێریشان ترکیا ل دژی رۆژئاڤایێ کوردستانێ و ھەرێمێن ھەسەدێ، راستەراست باندۆرێ ل خەباتا ھەسەدێ یا ل دژی شانەیێن داعشێ دکەت.