بابێ زارۆکەکا رەڤاندی بۆ مەزلووم عەبدی: رێزێ ل ئیمزایا خوە بگرە
وەلاتییەکی ژ باژارێ قامشلۆیێ، رێخستنەکا سەر ب په‌یه‌دێ ڤە تۆمەتبار دکەت کو کچا وی رەڤاندییە و بانگ ل فەرماندارێ گشتی یێ هه‌سه‌دێ مەزلووم عەبدی دکەت کو رێزێ ل ئیمزایا خوە یا كو ل جنێڤێ ل سەر رێکكەفتنا قەدەغەکرنا لەشکەرکرنا زارۆکان كری، بگریت.
وەلاتیێ ب ناڤێ فەتحه‌للا گەدۆ بانگەوازیەک بەلاڤ کر و تێدا راگه‌هاند، «كچا وی یا 16 سالی سەما فەتحه‌للا گەدۆ ژ رۆژا 19/12/2021ێ ڤە ژ ئالیێ تەڤگەرا جوانێن شۆرەشگەر یا سەر ب په‌یه‌دێ ڤە هاتییە رەڤاندن».
فه‌تحه‌للا گەدۆ ددەته زانین: «كچا من ل پۆلا 11 دخوینیت و یا نەخوشە و ل گۆری راپۆرتا پزیشكان نەخوشیێن (نەئورۆلۆژیک، پسیکۆلۆژیک، دەپرەسیۆنا گران، ئیزۆلاسیۆن، ئاترۆفی و کورتبوونا مەزنبوونێ) د گه‌ل دا هه‌نه».
بابێ وێ زارۆکێ ئاماژە ب وێ ژی دا، «د چەند رۆژێن بووری دا سۆزێن ڤەگەراندنا كچا من بۆ مالێ ب هنده‌ك خزم و هەڤالێن من هاتبوون دان، لێ هەتا نها ئەو سۆز نەهاتنە جێبه‌جێكرن».
فه‌تحه‌للا گەدۆ، د بانگەوازییا خوە دا بانگ ل رێخستنێن ناڤدەولەتی یێن یاسایی و مرۆڤی، کەسێن گرنگیێ دده‌نه مافێن زارۆک و دایکان، پارتیێن سیاسی یێن کوردی، کار ژ بۆ ڤەگەراندنا كچا وی بۆ مالێ بکه‌ن، تا کو كچا وی چارەسەریێن پزیشكی وەربگریت.
بابێ زارۆکا په‌كه‌كێ ره‌ڤاندی هاوارا خوە دگه‌هینیت مەزلووم عەبدی و دبێژیتێ: رێزێ ل ئیمزایا خوە بگرە
هەروها فه‌تحه‌للا گەدۆ دبێژیت: «ئەز ب تایبەتی بانگ ل فەرماندارێ گشتی یێ هه‌سه‌دێ مەزلووم عەبدی دکم کو رێزێ ل ئیمزایا خوە یا كو ل جنێڤێ ل سەر رێکەفتنا قەدەغەکرنا لەشکەرکرنا زارۆکێن د بن 18 سالیێ دا كری، بگریت».
بابێ زارۆکێ تەکەز دکەت: «هه‌سه‌ده و پارتییا یەکیتیا دەمۆکراتیک (په‌یه‌ده) ب ته‌مامی ژ سلامه‌تییا زارۆکا من و خرابوونا تەندورستییا وێ ژ نها و پێدا بەرپرسیارن».
فه‌تحه‌للا گەدۆ، د بانگەوازیا خوە دا دبێژیت: «ئەز بانگ ل هەموو کەسێن کو په‌یوه‌ندی ب پرسێن نشتیمانی و مرۆڤی هه‌یه دکه‌م کو کار ژ بۆ راوەستاندنا دیاردەیا رەڤاندنا زارۆکان ژ ئالیێ جوانێن شۆرەشگەر و هەموو ئالیێن دی یێن لەشکەری بکه‌ن».
ژ ئالییەکی دی ڤە، رێخستنا مافێن مرۆڤان ل عەفرینێ د راپۆرتەکێ دە بەلاڤ کر، ل باژارێ قامشلۆ گرووپەکێ ژ تەڤگەرا جوانێن شۆرەشگەر رۆژا 19/12/2021ێ كچا 16 سالی سەما فه‌تحه‌للا گەدۆ، دەما دچوو ناڤەندا «هانزا» یا پەروەردەیی رەڤاندن و ئارمانج ژ رەڤاندنێ ئەوە، وێ تەڤلی ناڤا هێزێن یه‌په‌ژێ بکه‌ن.
هه‌رچه‌نده کو هێزێن سووریەیا دەمۆکراتیک (هه‌سه‌ده) د خزیرانا 2019ێ دا دگه‌ل نەتەوەیێن یەکبوویی پلانەک ژ بۆ بداویکرن و قەدەغەکرنا لەشکەرکرنا زارۆکان ئیمزا کربوو، لێ ژ دەما کو پەیمان هاتییە ئیمزاکرن، رەوشا رەڤاندنا زارۆکان ب داوی نەبوویە.
