پەکەکە ل دژی کورێن مام جەلال دەست ب کار بوو
دەما دو رۆژانە پەکەکێ ب ئاوایەکێ سیستەماتیک، تەڤ مەدیایا خوە یا سێبەر و ئالیگرێن خوە هاندانە کو ئێریشی هەر دو کورێن مام جەلال بکن و وان ب توندی رەخنە بکن، پەکەکێ فەرمان دایە پرانیا ئالیگرێن خوە یێن ل ئەورۆپایێ کو بێ ناڤبەر ئێریشی سەر هەر دو کورێن مام جەلال بکن و د ناڤا سۆسیال مەدیایێ دا بێرێزیێ ل وان بکن.
چاڤکانیێن پێگەها دارکا مازی ل ئەورۆپایێ ئەشکەرە کرن، د دەما دو رۆژێن رابۆری دا، پەکەکێ ب ئاوایەکی سیستەماتیک دەست ب ئێریشکرنە سەر هەر یەک ژ “قوباد تالەبانی و باڤل جەلال تالەبانی” کریە، ژ بۆ ڤێ یەکێ ژی تەڤ مەدیایا خوە یا سێبەر و ئالیگرێن خوە سەفەربەر کرینە.
پەکەکە پارڤەکرنا وێنەیێ هندەک جوانێن باشوور ب جلکێن زیندانیان، یێن کو ژ بەر شەوتاندنا پرتووکخانەیا پیرەمەگرۆنێ د خوەپێشاندانێن ڤێ داویێ دا ژ ئالیێ هێزێن ئەولەکاریێ ڤە هاتبوون دەستەسەرکرن وەکە هێنجەت بکار تینە و ئێریشی کورێن مام جەلال دکە.
تەڤی کو بەرپرسێ ئاساییشا سلێمانیێ راگهاند، پارڤەکرنا وێنەیێ وان جوانێن هاتینە گرتن ب جلکێن رەنگ پەرتەقالی ب واتەیا هەڤبەرکرنا وان جوانان ب گرتیێن داعشێ نینە و ئەڤ جلکە یێن تەڤ زیندانیانە، لێ بەلێ، پەکەکە د مەدیایا خوە دا دخوازە ووسا بدە نیشاندان کو پشتی نەمانا قەیوومێ وان “لاهۆر جەنگی بورهان” ل سەر دەستهلاتا سلێمانیێ ئیدی باژار بێ خوەدی مایە و کورێن مام جەلال هێژایی دەستهلاتێ نینن و جوانێن سلێمانیێ وەکە تەرۆریست حەساب دکن.
ژ ئالیەک دن، پەکەکە ب ڤێ کارێ دخوازە روورەشیا خوە ڤەشێرە، ژ بەر کو پرانیا وان جوانێن هاتیە گرتن ئالیگرێن پەکەکێ ب خوە نە و فەرمان ژ پەکەکێ وەرگرتیە کو ئێریشی سازیێن حکوومی بکن و وان بشەوتینن.
ئەڤ ئێریشا مەدیایا پەکەکێ ل سەر هەر یەک ژ قوباد تالەبانی و بافل جەلال تالەبانی د دەمەکی دا یە کو ل باشوورێ کوردستانێ باس ل یەک هەلوەستیا پەدەکێ و یەنەکێ ل بەغدایێ تێ کرن و ئاگاهی ووسا ددن خوەیاکرن وێ هەر دو پارتێن دەستهلاتدار ل باشوورێ کوردستانێ ب یەک پاکێج و یەک دەنگ ل بەغدایێ کار بکن، ئەڤ ژی بوویە سەدەما نەرەحەتییا پەکەکێ.
