عەبدولستار مەجید: قاچاخچیێن پەزی بەرتیلا ددەنە پاسدارێن ئیرانێ و چەکدارێن پەکەکێ!

عەبدولسەتار مەجید

سەرۆکێ کۆمیسیۆنا چاندن و ئاڤدێریێ ل پارلەمەنتۆیا کوردستانێ دبێژە، ب قاچاخی دەرباسکرنا پەز و دەواران ژ ئیرانێ بۆ ھەرێما کوردستانێ بەردەوامە و قاچاخچی رۆژانە بەرتیلێ ددەنە پاسداران و پەکەکێ!

پارلەمەنتەرێ کۆمەل و سەرۆکێ کۆمیسیۆنا چاندن و ئاڤدێریێ ل پارلەمەنتۆیا کوردستانێ، عەبدولسەتار مەجید ل سەر فەیسبۆکا خوە راگەھاندیە، رۆژانە ب ھەزاران پەز و دەوار ب قاچاغی ژ ئیرانێ دەرباسی ھەرێما کوردستانێ تێنە کرن.

عەبدولسەتار مەجید ھەر وەھا گۆتیە، قاچاخچی ژ بۆ کو بکارن سینۆری دەرباس بکەن، بەرتیلێ ددەن پاسدارێن ئیرانێ و چەکدارێن پەکەکێ.

ب گۆتنا وی پارلەمەنتەری، پاسدار سەرێ ھەر پەزەکێ ملیۆنەک دو ملیۆن توومەن و پەکەکە ژی سەرێ ھەر پەزەکێ 200 دۆلاران دستینیت!

عەبدولسەتار مەجید ئەڤ ڤیدیۆیە وەک بەلگە د حەسابا خوە یا فەیسبۆکێ دا پارڤەکریە و راگهاندیە، ئەڤ ڤیدیۆیە بەلگەیا ب قاچاخ ئینانا پەزی یە ل ئیرانێ و رۆژانە ب ڤی ئاوا پەز داخلی هەرێما کوردستانێ دهێتە کرن.