هه‌ولێن رێخستنا په‌كه‌كێ یێن نه‌شرینكرنا حكوومه‌تا هه‌رێما كوردستانێ، ل رۆژئاڤا وه‌لات ده‌وام دكن، هه‌ری داوی عه‌ره‌بێن حه‌سه‌كێ ب دارێ زۆرێ ده‌رخستن خوه‌پێشاندانان و سلۆگان ل دژی حكوومه‌تا باشوور ئاڤێتن.
چاڤكانیێن پێگه‌ها «داركا مازی» ل رۆژئاڤا كوردستانێ ئه‌شكه‌ره كرن، ل 3 رۆژێن رابووری رێخستنێن په‌یه‌دێ باسكێ په‌كه‌كێ یێ رۆژئاڤا كوردستانێ، ب سه‌دان عه‌ره‌بێن حه‌سه‌كێ ب دارێ زۆرێ و گه‌فان و هنده‌ك ژی ب په‌ره‌یان كۆم كرن ژ بۆ كو خوه‌پێشاندانێ ل دژی حكوومه‌تا هه‌رێما كوردستانێ، ئه‌نجام بدن.
ئه‌ڤ خوه‌پێشاندان رۆژا شه‌مبی 8\1\2022ێ هات ئه‌نجام دان و كه‌سێن كو په‌یه‌دێ ب دارێ زۆرێ كۆم كرنه، ژ مه‌یدانا ب ناڤێ سینالكو ده‌ست ب مه‌شێ كرن و به‌ر ب مه‌یدانا ئاگركوژێ یا ل ناڤچه‌یا تل حه‌جه‌ر ڤه چوون، وان پانكارت و سلۆگانێن ل دژی گرتنا ده‌ریێ سینۆر ئاڤێتن و حكوومه‌تا باشوور ب هه‌ڤكارییا ل گه‌ل تركیێ سووچبار كر.
د ڤێ خوه‌پێشاندانێ دا، زێده‌باری كو په‌كه‌كێ ئالایێن خوه و وێنه‌یێن زه‌لامێ ئیمرالیێ خستبوون د ده‌ستێن خه‌لكێ دا، نوونه‌رێن رێڤه‌به‌رییا خوه‌سه‌ر و په‌یه‌دێ ژی ئاماده بوون و وان د گۆتنێن خوه دا هێرشێ حكوومه‌تا باشوور كرن و گۆتن: حكوومه‌تا هه‌رێما كوردستانێ ژ بۆ كو گه‌لێ رۆژئاڤا بێخیته دۆرپێچێ، ده‌ریێ سێمالكایێ قه‌پات كرنه.
پەیەدێ ب دارێ زۆرێ خه‌لكێ دربێسیێ ژی ل دژی حكوومه‌تا باشوور راكرییه
هێژای گۆتنێ یه، چەکدارێن پەیەدێ ل رۆژا ئینییا رابووری ژی ل باژارێ دربێسیێ یێ رۆژئاڤا کوردستانێ، ب دارێ زۆرێ خەلک کۆم کر و ب سەر مالێن وان دا دگرت و ژ وان را دگۆت: «هەگەر هوون سوبە نەچن دەریێ سێمالکا و خوەپێشاندانان ل دژی حکوومەتا هەرێما کوردستانێ نەکن، ئەم رێ نادن ئێدی هوون چ کاران بکن».
ل 15 دیسامبەرا 2021ێ، رێخستنا پەکەکێ ب رێیا دەهان عەرەبێن دێرکێ و قامشلۆ و رێخستنا «جوانێن شۆرەشگەر» ب کەڤر و مۆلۆتۆفان هێرشی دەریێ پێشابوورێ کرن و هەژمارەکە زێرەڤانێن خالا سنۆری بریندار کرن، هەروەها جامێن ترومبێلێن ئاگرکوژ یێن دەریێ سنۆری شکاندن، ئەڤ هێرش ژی بۆ ئەگەر کو دەریێ پێشابوورێ بهێتە گرتن.
ئه‌ڤ هێرش وه‌كه پیلانه‌كا رێخستنا په‌كه‌كێ تێ حه‌ساب كرن ژ بۆ كو گه‌لێ رۆژئاڤا بێ برسیكرن داكو هنجه‌ته‌ك بكه‌ڤه ده‌ست وێ ژ بۆ كو حكوومه‌تا باشوور ل به‌ر چاڤێن رۆژئاڤا ره‌ش بكه، لێ به‌لێ گه‌لێ رۆژئاڤا باوه‌ر ژ ڤێ ده‌ره‌وا په‌كه‌كێ نه‌كرنه، لوما په‌كه‌كه وان ب دارێ زۆرێ كێشی سێمالكایێ و خوه‌پێشاندانان دكه‌ت.
