شاندا ئەنەکەسێ لگەل جیگرێ نوونەرێ تایبەتێ سەرۆکێ ئامەریکایێ بۆ سووریێ ماتیۆ پارل جڤیا و تەکەز کر، کو دەریێ پێشابوور-سێمالکا ژ بەر بنپێکرنا مافان و چالاکیێن گرووپێن چەکدارێن سەر ب پەیەدێ ڤە ھاتیە گرتن.
دەستەیا سەرۆکاتیا ئەنەکەسێ د داخویانیەکێ دا راگھاند، شاندا ئەنەکەسێ کو ژ محەمەد ئیسماعیل، فەسلا یووسف، سلێمان ئۆسۆ و فەیسەل یووسف پێک دھات، دوھی 10/1/2022یێ، لگەل جیگرێ نوونەرێ تایبەتێ سەرۆکێ ئامەریکایێ بۆ سووریێ ماتیۆ پارل جڤیا.
د داخویانیێ دا ھات گۆتن، ئالیێ ئەنەکەسێ د جڤینێ دا تەکەزی ل سەر بھێزکرنا پەیوەندیان لگەل ئالیێن ئامەریکی و گرنگیا پشتەڤانیا وێ ژ بۆ ئارامیا ناڤچەیێ کر کو ژ بەر تێکچوونا رەوشا ئابۆری و باندۆرێن وێ یێن نەرێنی، وەلاتی نەچار دبن کۆچبەر ببن.
د داخویانیێ دا ھات دەستنیشان کرن، ئەنەکەسێ د جڤینێ دا ئاماژە ب بنپێکرنێن گرووپێن چەکدارێن سەر ب پەیەدێ ڤەیێن ل دژی ئەنەکەسێ کر و گۆت کو کریارێن وان گرووپان بوونە سەدەما گرتنا دەریێ پێشابوورێ ژ ئالیێ ھەرێما کوردستانێ ڤە، ڤێ یەکێ ژی ھیشتیە رەوشا وەلاتیان خرابتر ببە و دەریێ وان یێ سەرەکی بهێتە گرتن.
د داخویانیێ دا ھات گۆتن، نوونەرێ ئامەریکایێ تەکەزی ل سەر بھێزکرنا پێوەندیێن ل گەل ئەنەکەسێ و پشتەڤانیا وەلاتێ خوە ژ بۆ ئارامیا ناڤچەیێ کر و گۆت کو ئەو دێ لگەل ئالیێن پێوەندیدار دا وان پرسگرێکێن کو د جڤینێ دا ھاتنە گۆتووبێژکرن چارەسەر کەت.
ھەروھا د داخویانیا ئەنەکەسێ دا ھات: “بالیۆزێ ئامەریکی گۆت ژی، ئامەریکا ھەولا ڤەکرنا دەریێ سینۆری ددەت، ژ بۆ بکارئانینا وێ د وارێ ئابۆری و مرۆڤاھی دا، بێی کو چ پرسێن دی بکەڤنە کارێ وی دەری دا، یان ئاستەنگی ل پێش چێببن.
