900 کۆچبەرێن دی ژ رۆژئاڤایێ کوردستانێ گەھشتنە کەمپەکا دوھۆکێ

ژ بەر خرابیا رەوشا ئەولەھی و ئابۆریێ، پێلەکا دی یا کۆچبەریا وەلاتیێن رۆژئاڤایێ کوردستانێ بەر ب ھەرێما کوردستانێ ڤە دەست پێ کریە کو د ھەیاما رۆژێن بۆری دا نێزیکی 900 کەسان گەهشتینە کامپا بەردەرەش یا ل پارێزگەھا دوھۆکێ.

ل گۆر زانیاریان، د دو رۆژێن بۆری دا 880 کەس ژ کۆچبەرێن رۆژئاڤایێ کوردستانێ د ریێن قاچاخ را گەھشتینە کامپا بەردەرەش.

ئەڤ ھەژمارا کۆچبەران، تەنێ ئەون یێن کو گەهشتینە کەمپا بەردەرەشێ و ل گۆر زانیاریان هێژ ھەژمارەکا دی ژی ھەنە و نها د رێ دا نە و نەگھیشتنە ڤێ کامپێ.

کۆچبەرێن رۆژاڤایێ کوردستانێ ددەنە دیار کرن، وان ژ بەر خرابیا رەوشا ئابۆری و ژیانێ دەست ژ جھ و وارێ خوە کێشایە و بەرێ خوە دایە ھەرێما کوردستانێ.

ژ دەستپێکا کریزا سووریێ د سالا 2011ێ ڤە، ب سەدان ھەزار وەلاتیێن رۆژئاڤایێ کوردستانێ ژ بەر رەوشا شەری، نەبوونا ئەولەھیێ و تێکچوونا رەوشا ئابۆریێ بەرێ خوە دانە ھەرێما کوردستانێ. لێ ڤێ جارێ ئەڤ پێلا کۆچبەریێ زێدەتر ژ بەر تێکچوونا رەوشا  ئابۆریێ یە.

ل گۆر زانیاریان، کۆچبەر ب ریێن قاچاخ ژ رۆژئاڤایێ کوردستانێ دەرباسی ھەرێما کوردستانێ دبن، د وێ دەربارێ دا شانەیا راگھاندنا ئەولەھیێ یا ئیراقێ راگھاند، وان 62 کەسێن سووری کو سنۆر ب قاچاخی دەرباس کرنە دەستەسەر کرینە.

هێژایی گۆتنێ یە، پێش چەند رۆژان ژی نیزیکی 200 ولاتیێن دی ژ بەر خرابیا رەوشا ئەولەھی و ئابۆریێ ل رۆژئاڤایێ کوردستانێ، ب رێیێن قاچاغ ژ رۆژئاڤایێ کوردستانێ دەرباسی باشوورێ کوردستانێ بوونە و ئەو ژی ل کەمپا بەردەرەش هاتنە بجیهکرن.