مالپەرا رۆژ نیۆز یا پەکەکێ کو ل سلێمانیێ وەشانێ دکەت، ژ بۆ شەرمەزارکرنا حکوومەتا ھەرێما کوردستانێ نووچەیێن درە چێدکەت و پارڤە دکەت. هەری داوی ژی گۆتنێن رێڤەبەرێ ژۆرا بازرگانییا دوھۆکێ ئەیاد حسێن ساختە کرن.
د نووچەیێن ئیرۆ یێن رۆژ نیۆزێ دا، ب تایتلێ: «سەرۆکێ ژۆرا بازرگانیا دھۆکێ: گرتنا دەریێن سینۆری باندۆرەکا نەرینی ل ئابۆریێ دکەت” نووچەیەک هاتیە چێکرن کو د وەشانێن کورمانجی و ترکی یێن رۆژ نیۆزێ دا ب رەنگێن جودا ھاتە پارڤە کرن.
د نووچەیا بەشا سۆرانی دا ئەیاد حسێن گۆت، «سەدەما گرتنا دەری بوویەرێن سیاسی نە. خەلک بریندار بوویە. ھەولدان ھەنە دەری بهێتە ڤەکرن، ئەم ھێڤی دکەین کو دیسا دەری ڤەبیت.» مالپەرا رۆژ نیۆز ئەڤ نووچە وەرگەراندە سەر زمانێ ترکی ژی و ل سەر ناڤێ ئەیاد حسێن گۆت، «گرتنا دەریێن رۆژئاڤا و باشورێ ژ ئالیێ پەدەکێ ڤە بریارەکا سیاسییە. ھەر رۆژ د ناڤبەرا رۆژئاڤا و باشورێ دا هەڤگوھارتنا بەرھەمان دھاتە کرن. گرتنا دەری زیانێ دگەهینتە بازرگانیا ھەرێمێ. ئابۆریا رۆژئاڤا و باشوور ژی باندۆرەکا نەرینی دبینیت. ڤان پێکانینان ئەنجامێن گەلەک خراب ھەنە. ئەم ھێڤی دکەین کو دەری ڤەبیت. خەباتێن ژ بۆ ڤەکرنا دەری ژی بەردەوامن.»
رۆژ نیۆز د وەشانێن خوە دا داخویانیا ئەیاد حسێن ب ترکی و کورمانجی ب رەنگەکێ و ب سۆرانی ژی ب رەنگەکێ دی نڤیساند.
چاپەمەنیا پەکەکێ دەما کو گەلەک جاران نووچەیێن ل سەر باشوور و رۆژئاڤایێ کوردستانێ وەردگەرینن ترکی، داخویانیان سەختە دکەن. پەکەکە ووسا هزر دکەت کو گەل ترکی نزانیت و نکاریت درەوێن وان ئاشکەرا بکەت، پەکەکە ژ بۆ کو تەماشەڤانێن خوە بخاپینیت پەنایێ دبەتە بەر درەوان و سیاسەتا رەشا کو د ئەخلاقێ چاپەمەنیێ دا نینە.
مالپەرا مە بەریا نھا ژی نووچەیێن ب زاراڤێن جودا یێن مەدیایا پەکەکێ یێن دەربارێ شەهیدبوونا 10 پێشمەرگەیێن کو ل گوندێ خدرجە شەھید بووبوون ئاشکەرا کربوون. گەلێ باشوورێ کوردستانێ ژی ژ بەر کامپانیایا نووچەیێن درەو کو ژ ئالیێ سەرنڤیسەرێ بەشێ ترکی یێ رۆژ نیۆزێ ئانکو سەیید ئەڤران ڤە دهێنە چێکرن، د ھشیاریەکا جدی دایە و ب گومان راپۆرتێن مەدیایا پەکەکێ دشۆپینن.
