رێڤەبەریا خوەسەر وێنەگرێ ئاژانسا فرانس پرێسێ، دەلیل سلێمان، ژ کاری قه‌ده‌غه كر، پشتی کو دیمەنێن ئاسمانی یێن کو پارزوونگەهێن پەترۆلێ ل گوندەوارێن رۆژهلاتێ قامشلۆ نیشان دده‌ن، به‌لاڤ كرن.
مالپەرا “سوویا tv” ل سەر زارێ چاڤکانیەکی ژ ئەنجوومەنا جێبه‌جێکار یێ رێڤەبەرییا خوەسەر راگه‌هاند کو «دەستەیا راگه‌هاندنێ یا رێڤەبەرییا خوەسەر نڤیساره‌ك ژ بۆ ئاژانسا فرانس پرێس هنارتییه و تێدا دیار كرییه كو وان وێنەگرێ وێ یێ ب ناڤێ دەلیل سلێمان، ژ کار كرنێ ل هەرێمێن د بن کۆنترۆلا هه‌سه‌دێ دا قه‌ده‌غه كرییه».
دیار کر کو بریارا قه‌ده‌غه كرنا سلێمان ژ به‌ر چالاكیێن وی یێن رۆژنامەڤانی یه و رێڤه‌به‌رییا خوه‌سه‌ر د بن زەختا کادرێن په‌كه‌كێ دا ئه‌ڤ هه‌نگاڤ هاڤێتییه، ژ به‌ر كو رێخستنا په‌كه‌كێ ژ روومالکرن و چالاکیێن رۆژنامه‌ڤانی یێن وی وێنەگری عاجز بوویه.
چاڤکانی گۆت کو «به‌ری چه‌ند رۆژان رێڤه‌به‌رییا خوه‌سه‌ر گه‌ف ل سلێمان كربوون، لێ به‌لێ پشتره سلێمان جهێن پیساتی و گلێشی یێن نێزی زه‌ڤیێن په‌ترۆلێ ل قامشلۆ وێنه‌كرن كو ب دەهان مالبات، پرانیا وان ژن و زارۆک، ل وان جهان كۆم دبن و ل خوارنێ دگەرن دا کو خوە تێر بکه‌ن».
هه‌روه‌ها به‌ری چه‌ند رۆژان ژی، سلێمان خوه‌پێشاندانه‌كا ژنان ل باژارێ قامشلۆ وێنه‌كربوو کو تێدا وان ژنان داخوازا ڤەگەراندنا کەچێن خوە یێن تەمەن بچووک کربوون، کو د داویا سالا بۆری دا ژ ئالیێ رێخستنا جوانێن شۆرەشگەر ڤە هاتبوون رەڤاندن، ئه‌ڤ هه‌ردو چالاكی سه‌ده‌مێن سه‌ره‌كه‌نه كو په‌كه‌كێ سلێمان ژ كاركرنێ قه‌ده‌غه كری و عاجزییه‌كا مه‌زن ژ بۆ به‌رپرسێن رێڤه‌به‌رییا خوه‌سه‌ر و رێخستنا په‌كه‌كێ چێكری
