د دو حه‌فتیێن رابووری دا، 5 جاران ب مووشه‌كان هێرشا باره‌گه‌ها ئارتێشا تركیێ یا ل سنۆرێ پارێزگه‌ها نه‌ینه‌وایێ هاتییه كرن، یه‌كینه‌یێن حه‌شدا شه‌عبی ژی ب هێرشێ تێن سووچبار كرن.
ل دره‌نگیێن شه‌ڤا ده‌رباسبوویی 15-1-2022ێ، باره‌گه‌ها ئارتێشا ترکیێ یا ل ناڤچەیا زێلکان ل سنۆرێ پارێزگەها نەینەوایێ، راستی هێرشەکا مووشەکی هات، ئارتێشا ترك ژی به‌رسڤا هێرشێ دان، ل گۆری پێگەها «دژەتەرۆرێ یا هەرێما کوردستانێ»، 3 مووشەک ئاراستەی باره‌گه‌هێ هاتنە کرن.
هێرشا شه‌ڤا ده‌رباسبوویی یا دویه‌مین بوو د24 ساعه‌تان دا تێ ئه‌نجام دان و یه‌كینه‌یێن حه‌شدا شه‌عبی ب وان هێرشان تێن سووچبار كرن.
ل گۆری مه‌دیایا ئیراقی، د دو حه‌فته‌یێن رابووری دا، 21 مووشه‌كێن كاتیووشا و گراد ئاراسته‌ی باره‌گه‌ها زێلكان هاتنه كرن و ب ڤی ئاوایی:
هێرشا ئێكێ ل 27-12-2021 بوو.
هێرشا دوێ ل 31-12-2021ێ بوو.
هێرشا سێیێ ل 3-1-2022ێ بوو.
هێرشا چارێ ل 15-1-2022ێ بوو.
هێرشا پێنجێ ل 15-1-2022ێ بوو.
پێگەهێن مەدیایێ یێن نێزیكی حەشدا شەعبی پاش هێرشا 27 دیسامبه‌رێ، ب ئاوایەکی نەراستەراست بەرپرسیارییا هێرشێ هلدان سەرێ حەشدێ و ژبۆ ئارتێشا ترک سلۆگانا «جهێ وە ل ڤێرێ نینه» به‌لاڤ كربوو.
