هێزێن ئاساییشا پارتییا یه‌كێتییا ده‌مۆكراتیك «په‌یه‌دێ» 3 وه‌لاتیێن كورد ل رۆژئاڤا كوردستانێ یێن باژارێ گرێ سپی ره‌ڤاندن و ل قامشلۆیێ، ب ئاوایه‌كێ هۆڤ كوشتن.
چاڤكانیێن پێگه‌ها «داركا مازی» ل رۆژئاڤا كوردستانێ زانیاریێن هه‌ری تایبه‌ت ل ده‌ربارێ یه‌ك ژ تاوانێن هۆڤ یێن ئاساییشا په‌یه‌دێ ب ده‌ست خستن، ئه‌و ژی تاوانا ره‌ڤاندن و كوشتن 3 وه‌لاتیێن باژارێ گرێ سپیێ یه.
چاڤكانیێن مه ل رۆژئاڤا كوردستانێ، ئاگاهیێن ڤێ تاوانێ ژ یێك ژ ئه‌ندامێن مالباتا قوربانییان ب ده‌ست خستنه، وی دیار كر كو ئاساییشا په‌یه‌دێ ل سالا رابووری 2021ێ 3 كه‌س یێن مالباتا وان ب ناڤێن «باسل ئه‌حمه‌د 38 سالی، مسلم عومه‌ر 42 سالی و ده‌روێش عومه‌ر 64 سالی» كو ژ ناڤچه‌یا سلۆكێ یا گرێدای باژارێ گرێ سپیێ نه، ده‌سته‌سه‌ر كرن.
وی ئه‌ندامێ مالباتا قوربانییان گۆت: «ته‌ڤی كو ئه‌م نزانن ئه‌و ل سه‌ر چ سووچه‌كێ هاتن ده‌سته‌سه‌ر كرن، لێ به‌لێ ئاساییشا په‌یه‌دێ هه‌ر ئه‌شكه‌نجه‌یه‌كا گران ل وان كر، پشتره ئه‌و ل قامشلۆیێ ب ئاوایه‌كی هۆڤ كوشتن».
هه‌روه‌ها ده‌ست نیشان كر، ئاساییشا په‌یه‌دێ جه‌سه‌دێن قوربانییان راده‌ستی وان نه‌كرن و ئه‌و ل جییه‌كێ نه‌دیار سپارتن ئاخێ، ژ بۆ كو ئه‌ڤ ته‌وان بهێته ڤه‌شارتن.
ل گۆری ئاگاهیێن مالباتا قوربانییان، ئه‌ڤ تاوانا ئاساییشا په‌یه‌دێ یه‌كه ژ سه‌دان تاوان و جینایه‌تێن هه‌مئاوا یێن كو گه‌لێ رۆژئاڤا كوردستانێ ب تایبه‌ت یێن كو نه دگه‌ل په‌كه‌كێ و په‌یه‌دێ دا نه، رۆژانه ژیان دكه‌ن.
