چه‌ته‌یێن تركیێ 50 تەنەکەیێن زەیتێ ژ پیرەژنەکا عەفرینی ستاندن

zeyt ji pîrejineke Efrînî

كۆمێن چەکدارێن سەر ب ترکیێ ڤە، 50 تەنەکەیێن زەیتێ ژ پیرەژنەکا کورد ل عەفرینێ دستینن، هەروه‌ها 5 تراکتۆرێن هەمان مالباتێ ژی دزینە.

به‌رده‌ڤكێ رێخستنا مافێن مرۆڤان – عەفرین، ئیبراهیم شێخۆ ژ تۆرا مەدیایی یا رووداوێ را راگه‌هاند، «چەکدارێن گرووپا ب ناڤێ عەمشات یا سەر ب ترکیێ ڤە ل عەفرینێ، 50 تەنەکەیێن زەیتا زەیتوونان ژ پیرەژنەکە کورد ستاندنە».

ئیبراهیم شێخۆ هەروه‌ها دیار کر، ناڤێ وێ پیرەژنا 80 سالی «ئەمینە حاجی فایق» ژ گوندێ خەلیلی کۆلکۆیێ سەر ب ناڤچه‌یا شیێ ڤە یە.

شێخۆ گۆت: وێ پیرەژنا کورد دشێت ته‌نێ 17 تەنەکەیان ژ زەیتا خوە یا كو چه‌كداران ژێستاندییه‌، ڤەگەرینیت.

ل گۆری زانیاریێن کو بەردەڤکێ رێخستنا مافێن مرۆڤان-عەفرین كو دانە رووداوێ، «چەکدارێ ب ناڤێ نیدال بیانوونی یێ سەر ب گرووپا چەکدارا ب ناڤێ عەمشات ل گەل هەژمارەک ژ چەکدارێن دن، تەنەکەیێن زەیتێ یێن مایی برنە».

ل گۆر هەمان زانیارییان، چەکدارێن سەر ب ترکیێ ڤە 5 تراکتۆرێن هەمان مالباتێ د دەما 5 شەڤان دا دزینە، کو تراکتۆرێن زارۆکێن پیرەژنا کورد ئەمینە حاجی فایق بوونە.

پوستێن ھەمان بەش