ئەڤە 3 رۆژن کو ھێزەکا مەزنا ئیراقێ ل شنگالێ بجیھ بوویە و د رەوشا ئامادەباشیێ دایە و فەرماندارەکێ پێشمەرگەیێن شنگالێ ژی دبێژیت، ئالۆزی د ناڤبەرا پەکەکێ و ھێزێن ئیراقێ دا چێبوویە و مەترسی ل سەر شنگالێ ھەیە.
فەرماندارێ پێشمەرگەیێن شنگالێ قاسم شەشۆ راگھاند: “ئەڤە چەند رۆژن کو ل سینۆرێ شنگالێ ئالۆزی دەرکەتینە و سەبەبا وێ ئالۆزیێ ژی ئەوە کو پەکەکە دخوازیت رێڤەبەریا شنگالێ بێخیت دەستێ خوە و ھەرتشت د دەستێ وان دا بیت. ڤێ یەکێ ژی ئالۆزی د ناڤبەرا وان و حکوومەتا ئیراقێ دا چێکریە و حکوومەتا ئیراقێ ھێزەکق مەزن ئانیە شنگالێ.”
قاسم شەشۆ وەھا گۆت: “ئەو ھێزێن کو ل شنگالێ بجیھ بوونە، ھێزێن نوو یێن ئیراقێ نە و ژبلی ناڤەندا شنگالێ ل پرانیا ناحیە و کۆمەلگەھێن شنگالێ بجیھ بوونە و د رەوشا ئامادەھیێ دا نە.”
شەشۆ وەھا دۆماند: “رەوشا شنگالێ ب خوە ئالۆزە و پەکەکێ ب خوە ژی ئالۆزتر کریە، کو دخوازن کێشە و پرسگرێکان بکێشنە ناڤا شنگالێ. ئەگەر رەوش چارەسەر نەبیت و نەهێتە کۆنترۆلکرن، بێگومان دێ هێتە ئاستا پەڤچوونێ د ناڤبەرا وان ھێزێن سەر ب پەکەکێ و ھێزێن ئیراقێ دا و ئەڤ یەک مەترسیێ ل سەر شنگالێ چێدکەت.”
چاڤکانیێن پێگەها دارکا مازی ئەشکەرا کر کو ئیرۆ هێزێن سەربازی یێن سەر ب ئیراقێ دوکاندارێن هەموو دوکانێن ڤەکری ل سنوونێ و خانەسۆرێ ئاگەهدار کرینە کو دەرگەهێن دوکانێن خوە بگرن ژ بەر کو مەترسیا پێکدادانێ د ناڤبەرا وان هێزێن سەر ب پەکەکێ ڤە هەیە.
