ل ناڤچەیا پازارجخ یا گومگومێ، بۆریا ڤەگوهاستنا پەترۆلێ یا هەرێما کوردستانێ ل ئالیێ ترکیێ تەقیایە و ژ بەر تەقینێ ئاگرەک مەزن چێ بوویە.
تەقینا بۆریێ شەڤێ دن ل جهەکی سەر ب ناڤچەیا پازارجخ یا گومگومێ و د ناڤبەرا پارێزگەهێن گومگوم و دیلۆکێ یێن باکورێ کوردستانێ دا چێبوویە، پشتی تەقینێ ئاگر ب دەرورووبەرێن رێیا سەرەکی یا دیلۆک – گومگومێ کەت و ئەو رێ ژ هەردو ئالییان ڤە بۆ هاتنووچوونێ هات گرتن.
کۆمپانیا بۆتاش کو کۆمپانیا سەرەکی یا ڤەگوهاستنا په‌ترۆلێ ل ترکیێ یە، د داخویانیەکێ دا راگه‌هاندییە کو بۆرییا ڤەگوهاستنا پەترۆلا هەرێما کوردستانێ ل ئالیێ ترکیێ تەقیایە و ژ بەر تەقینێ، ئاگرەکی مەزن چێبوویە.
سەدەما تەقینێ هەتا نها نەدیارە
هەر مەهێ ب رێیا بۆریا پەترۆلا هەرێما کوردستانێ، نێزیکی 10 ملیۆن بەرمیل پەترۆلا ئیراقێ هەناردەیی بازارێن جیهانێ دهێته كرن.
سەرۆکێ شارەداریا پازارجخێ، ئیبراهم یلمازجان راگه‌هاند، بوویەر 17 هەتا 18 کیلۆمەتران دووری ناڤچەیێ چێبوویە، وان هه‌ژماره‌كا زێدە یا تیمێن ئاگرڤەمراندنێ شاندینە جهێ بوویەرێ و گۆت: رەوش د کۆنترۆلا مە دا یە، لێ سه‌قا بۆ تیمێن ئاگرڤه‌مراندنێ ئاسته‌نگی یه.
ئیبراهم یلمازجان هەروه‌ها دیار کر، دێ ژ دیلۆکێ ژی ژ بۆ هاریكاریێ تیم چنه ناڤچەیا کو ژ بەر تەقینا بۆریا پەترۆلێ ئاگر لێ چێبوویە.
هێژای گۆتنێ یه، ل سالا 2020ێ ژی بۆریا په‌ترۆلێ یا هه‌رێما كوردستانێ ژ هێلا رێخستنا په‌كه‌كێ ڤه هاتبوو ته‌قاندن و ئه‌ڤێ یه‌كێ زرارێن ئابۆری یێن مه‌زن ب هه‌رێما كوردستانێ خستبوون.
