وەزارەتا پەروەردێ یا ترکیێ راگه‌هاند کو ژ بەر رەوشا نەرێنی یا سه‌قای، پرۆسەیا دەرسێن هلبژارتی هەتا 7ێ سباتا 2022ێ هات درێژ کرن.
ل گەلەک پارێزگەهێن باکورێ کوردستانێ و بەشەک ژ پارێزگەهێن ترکیێ، ئەڤ دەمەکە به‌فر زێدە دباریت و كارتێكرنه‌كا نه‌رێنی ل ژیانا رۆژانە یا وەلاتییان دکەت و هەژمارەکا زێدە خواندنگه‌هان هاتنه گرتن.
ل گۆر پرۆسەیا بەرێ، دەما دەرسێن هلبژارتی هەتا 21ێ ڤێ مه‌هێ بوو و ئەڤه چەند رۆژن کو ل پرانییا پارێزگەهان خواندنگه‌هـ هاتنە گرتن و خوەندکاران نه‌شیابوون دەرسا كو دخوازن هلبژێرن و ل سەر مەدیا جڤاکی ب هەشتاگا «#seçmeliderssuresiuzasın» درێژکرنا پرۆسەیێ کەته رۆژەڤێ.
ل سەر ڤێ یەکێ وەزارەتا پەروەردێ یا ترکیێ ژی بریار دا کو ژ بەر رەوشا سه‌قای پرۆسەیا دەرسێن هلبژارتی هەتا 7ێ سباتا 2022ێ بهێته درێژکرن.
ل ترکیێ و باکورێ کوردستانێ ژ بۆ کو مالبات و خوەندکار دەرسا زمانێ کوردی هلبژێرن، ژ گەلەک ئالییان ڤە بانگ تێ کرن و كه‌مپین هاتنە دەستپێکرن.
ژ خوەندکارێن خواندنگه‌هێن ناڤین یێن پۆلێن 5-6-7 و 8 و مالباتێن وان دهێته خواستن کو سه‌ردانا رێڤەبەرییا خواندنگه‌هێن خوە بكه‌ن و کورمانجی و زازاکی وەک دەرسا هلبژارتی، هلبژێرن.
