کۆمارا کوردستانێ د رۆژا 22یێ چلەیا 1946ێ دا ل مەھابادێ ھات دامەزراندن و پێشەوا قازی محەمەد وەک سەرۆکۆمار سۆندا یاسایی خواربوو.
76 سال ل سەر دامەزراندنا کۆمارا کوردستانێ دا دەرباس بوون و ئالیێن دەمۆکرات د وێ باوەریێ دا نە کو ھەر چقاس تەمەنێ کۆمارێ کێم بوو ژی، خواستەک و داخوازا گەلێ کورد بوو ژ بۆ دامەزراندنا دەولەتا کوردستانێ و بوویە سەدەما چێبوونا چەند ھێمایێن گرینگێن کورد، کو ھەتا نھا ژی ل ھەر چار پارچەیێن کوردستانێ، کورد ل سەر وان ھێمایان یەکن.
بەری 76 سالان، کۆمارا کوردستانێ ل مەھابادێ، ل قادا چارچرا ھات راگھاندن، کۆمارەک ب پێشەنگیا پێشەوا قازی محەمەد، کو ھەر وەکە د راگھاندنا یەکەم دا ھاتیە، ئارمانجا وێ، دامەزراندنا کۆمارەکا دەمۆکراتا کوردستانێ بوو.
کابینەیا کۆمارا کوردستانێ ب ڤی رەنگی بوو:
سەرۆک: قازی محەمەد
سەرۆکوەزیر: حاجی بابە شێخ
وەزیرێ شەر: سەیفی قازی
وەزیرێ ناڤخوە: محەمەد ئەمین موینی
وەزیرێ ئابۆری: ئەحمەد ئیلاھی وەزیری
وەزیرێ پۆست و تەلەگراف: کەریم ئەھمەدیان
وەزیرێ چاند: مەناف کەریمی
وەزیرێ پرۆپاگاندا: سدیق حەیدەری
وەزیرێ کار: خەلیل خوسرەوی
وەزیرێ بازرگانی: حاجی مستەفا داووودی
وەزیرێ چاندنیێ: مەحموود وەلیزادە
وەزیرێ رێک و پران: ئیسمایل ئیلخانیزادە
وەزیرێ تەندورستیێ: سەیید محەمەد ئەیووبیان
وەزیرێ دەولەتێ: ئەبدولرەحمان ئیلخانیزادە
وەزیرێ دادێ: مەلا حوسێن مەجدی
پایتەخت: مەھاباد
دراڤ: ریالێ ئیرانێ
ھەر چقاس کۆمارا کوردستانێ، ل مەھابادێ ھات راگھاندن، لێ ژ ھێلا کوردستانیێن ھەر چار پارچەیێن کوردستانێ دھات پاراستن.
مەلا مستەفا بارزانی لگەل ھێزێن بارزان، ھێزێن سەرەکەیێن پارێزڤانێن ڤێ کۆمارێ بوون. پارێزڤانیەک ووسا کو قازی محەمەد ئەوقاس پێ باوەر بوو، بەری سێدارەدانێ، ئالا کوردستانێ دابوو وی دەستێ ئەمین.
ھەر چقاس تەمەنێ کۆمارا کوردستانێ تەنێ 11 مەھ بوو، لێ دەستپێکەکە زەلال و ئەشکەرا بوو ژ بۆ سەرخوەبوونخوازێن کوردستانێ. لەورا پشتی کو یەکیتیا سۆڤیەتێ لگەل حکوومەتا وێ دەمێ یا ئیرانێ ل ھەڤ کر و د ناڤ بێدەنگیا زلھێزێن دی دا داوی لێ ئانی و پێشەنگێن کۆمارێ ھاتن دارڤەکرن، لێ پشتی 76 سالان، خەونا سەرخوەبوونێ ھەر مایە و ئیرادەیەکا بھێز دایە.
