فەرماندارێ ھێزێن ئێزدخانێ حەیدەر شەشۆ راگھاند؛ ئارمانجا پەکەکێ ل ھەر دەرێن کوردستانێ تێکدانا سەقامگیری و ئارامیێ یە و ناخوازیت خەلکێ شنگالێ ڤەگەرن سەر جھ و وارێ خوە و دبێژیت: “پەکەکە ئەجیندایێن وەلاتێن دی جێبەجێ دکەت.”
حەیدەر شەشۆ بەشداری بولتەنا نووچەیان یا K24ێ بوو و دیار کر؛ پەکەکە دەرفەتێ ددەتە دەستێ ترکیێ، کو شنگالێ بۆمبەباران بکەت و کەسێن ژ ڤێ یەکێ زرارێ دبینن، تەنێ شنگالی و ئێزدی نە.
فەرماندارێ ھێزێن ئێزدخانێ ل سەر پێوەندیا ناڤبەرا پەکەکێ و حەشدا شەعبی و بەرژەوەندیێن وان یێن ھەڤبەش دەستنیشانکر؛ پلانا وان ھەر دو ئالیان ئەوە کو خەلکێ شنگالێ ل شنگالێ نەمینن. پلانا حەشدا شەعبی ئەوە کو سینۆرێ سووریێ کۆنترۆل بکەت، کو بەریا نھا پلانا ھیلالا شیعە ھاتیە دانان.
حەیدەر شەشۆ ئاشکەرا کر؛ ل ئالیێ دی پەکەکە ژی وێ دەرفەتێ ددەتە ترکیێ کو چیایێ شنگالێ بۆمبەباران بکەت و خەلکێ ئێزدی ببنە قوربانی.
سەبارەت دژبەریا پەکەکێ یا ل دژی رێکەفتنا شەنگالێ ژی حەیدەر شەشۆ ئەڤ نرخاندنە کرن
“دەما پەکەکە ھاتیە شەنگالێ ژ بۆ بەرژەوەندیێن خوە ھات، نە ژ بۆ پاراستنا ئێزدیان. پەکەکە ھات ڤێ ھەرێمێ، پشترا ل سەر داخوازا حەشدا شەعبی لگەل داعشێ دا ل رێکەفتن کر، بەلگە ژی ئەڤەیە کو دەما هاتینە شنگالێ ب رێکەفتن دەرباسی شنگالێ بوون. نھا ژی منەتداریا ئێزدیان دکەن و دبێژن “مە ھوون رزگار کرن”. پەکەکێ د بەردێلا رێکەفتنا لگەل حەشدا شەعبی دا ب ملیۆنان دۆلار ژ حەشدێ وەرگرتینە.”
شەشۆ ئانی زمان کو ئارمانجا پەکەکێ وێ دەمێ ئەو بوو کو گەلێ شنگالێ ژ ئاخا وان دەربێخیت و ھێژ ژی دکەت و گۆت، “ژ بۆ کو گەلێ شنگالێ دەم ب دەم ب بۆمبەبارانا ببیتە قوربانی، ژ بۆ ترکیەیێ زەمینەکێ ئاڤا دکەن و پلانێن ترکیێ پێک تینیت.”
شەشۆ دبێژیت: “ب راستی پەکەکە خەلکێ شنگالێ و ئێزدیان ناپارێزیت، پەکەکە بەرژەوەندیێن خوە و وەلاتێن کو پشتەڤانیا وێ دکەن، دپارێزیت.”
شەشۆ وەھا بەردەوام کر:
“پەکەکێ رەوشا رۆژئاڤا ژی خراب کریە. گەر رێک دابا گەلێ رۆژئاڤا، دا د ناڤا مەھەکێ دا ب سەد ھەزاران کەس ژ بەر زلما پەکەکێ رەڤن. ئەو دا نە ژ بەر ئێریشێن رەژما ئەسەد و نە ژی ژ بەر ئێریشێن ترکیایێ رەڤن، بەلکو دا ژ زلما پەکەکێ یا ل سەر گەل رەڤن. ل شنگالێ ئەم دبینین کو جار جاران ل ھەرێمێن د بن کۆنترۆلا خوە دا پرسگرێکەکا مەزن چێدکەن.”
