نووری چەلیک
دڤێت ئیرۆ هەموو کوردستانی د بن ئالا و رێبەریا سەرۆکێ کوردستانێ دا، ل دژی دەولەت و پارتیێن تەرۆرست دەست بدەنە ھەڤ و د ئاڤاکرنا کوردستانا ئازاد دا ببنە خوەدی پار. چاوا کو سەرۆک مستەفا بارزانی د دەما خوە دا گۆتبوو:”چ کەسێ کو روحا نەتەوەپارێزی دەف چێنەبووبیت، دێ رۆژەک ژ رۆژان خیانەتێ ل گەلێ خوە کەت” ئەڤ گۆتنە ژ بۆ ئیرۆ و ژ بۆ ھەر دەمێ ژی دەرباس دبیت.
ئیرۆ پرسگرێکا سەرەکی یا د ناڤ کوردا دا، پرسگرێکا پەکەکێ و کوردێ دەرڤەیی پەکەکێ یە. ھەر چقاسی ھەبوونا پەکەکێ یا ل قەندیل و دەڤەرێن دی ژ بۆ حکوومەتا کوردستانێ ژی سەرئێشاندنەکێ لگەل خوە دا بینیت ژی، دڤێت ژ باشوورییان زێدەتر ئەم کوردێن باکور سەرێ خوە ب ڤێ پرسگرێکێ ڤە بێشینین. د داخویانی و ھەلوەستێن ھندەک رایەدارێن پەکەکێ دا دیار دبیت کو، شەرێ ل دژی دەولەتا تەرۆریستی، چەتە و پارتیێن تەرۆریست دا ئالیکاریا ناڤدەولەتی، پەیوەندیێن ھەرێما کوردستانێ یێن لگەل جیرانا دا ئەو نەرەحەت کرینە.
گەر پەکەکە کاربیت سەبەبێ نەرەحەتیا خوە ل سەر ئەساسێ کوردایەتیێ ژ بۆ حکوومەتا هەرێما کوردستانێ بینە سەر زمان، ئەز باوەرم دێ وەک حکوومەت، ھەرێما کوردستان ژی بکاربیت چارەسەریەکێ ژ بۆ نەرەحەتیا پەکەکێ ببینیت. ژ خوە بەیانێن سەرۆکێ کوردستانێ یێن د وی واری دا گەلەک زەلالن. سەرۆکێ کوردستانێ د ھەر فرسەندێ دا چارەسەریێ د رێیا دیالۆگ و ریێن بێچەکی بوونێ و دەمۆکراتک دا تینە سەر زمان.
دڤێت ئەم باکوری ژ نھا دا بزانین کو، ھەگەر سبە یان دوسبە باکورێ کوردستانێ ئازاد بوو، دێ ئەڤ پرسگرێکا پەکەکێ کو ئیرۆ ل رۆژئاڤا و باشوورێ کوردستانێ ب شەکلەکێ کرێت خوە ل سەر ملەتێ کورد فەرز دکەت دێ ل باکور ژی دەستپێکەت. پرسگرێکا ھەیی پرسگرێکا هەموو کوردستانێ ژی بیت، دڤێت ئەم باکوری ژ ئیرۆ دا ب بەرپرسیاری تەڤ بگەرین و خوەدی سیاسەتەک نەتەوی بین. یان نە سبە ئەم ژی دێ تووشی شیدەتا پەکەکێ بین. و وێ گاڤێ ئەم ژی دێ تێکەڤین رەوشا کو نھا ل باشوور د ناڤبەرا داگیرکەرێن کوردستانێ و ھەموەلاتیێن وێ دا ھەیی دەردکەڤیتە ئۆرتێ.
پرسگرێکا چارەسەریا پەکەکێ و خوەدیلێدەرکەتنا وێ، نە ئەرکا باشوورە. ھەگەر ل باشوور پرسگرێکا تونەکرنا پەکەکێ ھەبیت، ئەرکا پێشین دکەڤیتە سەر ملێن باکورییان ب خوە و دڤێت ئەو ل خوە و ل دەسکەفتیێن خوە خوەدی دەرکەڤن.
دڤێت د سەری دا پەکەکە، دەسەت ژ سیاسەتا توندیێ بەردەت و ب رێیێن دەمۆکراتیک ل چارەسەرییا دیالۆگا د ناڤ کوردان دا بگەریت. لێ گاڤا پەکەکە وان دەستکەفتیێن کوردا بکەتە قوربانا شەخس یان ھەرێمەکێ (کارتۆن یان کانتۆنان) دڤێت ئەم کوردێن باکور ب دەنگەک بلند نە رازیبوونا خوە ل ھمبەر ھەلوستێن پەکەکێ یێن نە د بەرژەوەندیا مللەتێ کورد دا، بقیرین. ئەو رۆژ ژی ئیرۆیە….
بلا پەکەکە ژ نوو ڤە دەست ب شەرێ دەستکەفتیێن کوردستانا ئازاد بکەت. پەکەکە بوویە کەلەما چاڤێ کوردان. پەکەکێ دەست و پست دایە داگیرکەرێن کوردستانێ و شەرێ پەدەکێ و رومەتا ملەتێ کورد مالباتا بەرزانیان دکەت. پەکەکە شەرێ ھێژاییێن کوردان دکەت. پەکەکە نە تەنێ مخالفێ خوە، ھەروھا زاروکێن وان یێن سێ سالی ژی دکووژیت. پەکەکە ب ناڤێ هەرێمێن خوەسەر پارچە کرنا کوردستانێ ژ بۆ خوە کریە شیعار.
ب کوورت کورمانجی؛ پەکەکێ سوندا تار و مار کرنا کوردستانێ خواریە. ژ بەر ڤێ یەکێ ژی دڤێت هەموو کورد ب دەنگەکێ بلند بقیرن و ببێژن ئێدی بەسە زلم، و دەک و دۆلابێن پەکەکێ.
