دو کادرۆیێن پەکەکێ یێن ل رۆژئاڤایێ کوردستانێ ژ ئالیێ هێزێن ئەولەهیا رەژیما سووریێ ل دیمەشقێ هاتنە دەستەسەرکرن و پەکەکە ژی ل سەر ڤێ مژارێ بێ دەنگە.
چاڤکانیێن پێگەها دارکا مازی ل رۆژئاڤایێ کوردستانێ ئەشکەرە کرن، دلشا عەفرینی، کادرۆیا پەکەکێ و جێهگرا ئیلهام ئەحمەد یا سەرۆکا دەستەیا جیبجیکارا ئەنجوومەنا سووریایا دەمۆکراتیک و ئیلهام عۆمەر ئەنداما دەستەیا ھەڤسەرۆکاتیا مەجلسا سووریا دەمۆکراتیک ل دەستپێکا جووتمەها سالا 2021ێ، ب بەهانەیا وەرگرتنا چارەسەریێن پزیشکی چوونە دیمەشقێ، لێ بەلێ، پشترا دەرباسی باژارێ «ئەلسویدا» بوونە و لگەل هندەک ژ کەساتیێن پیکهاتەیا «درۆز» دا جڤیانە و ژ وان خواستنە کو هەول بدەن هەرێمەکا سەربخوە وەکە رێڤەبەریا خوەسەر ئاڤا بکن.
ڤان دو کادرۆیێن پەکەکێ گۆتیە کەساتیێن پێکهاتەیا درۆز، ژ بۆی ئەنجامدانا ڤێ یەکێ ئەو ئامادەنە کادرۆیێن خوە یێن خوەدی ئەزموون و شەهرەزایی بشینن باژارێ ئەلسویدا و دەورەیێن پەروەردەهیێ یێن تایبەت ژ بۆی وان ڤەکن داکو ژ نێزیک ڤە بەشداربوو هایداری ئارمانج و چەوانییا کارکرنا رێڤەبەرییا خوەسەر ببن.
هەر وەها چاڤکانیێن پێگەها «دارکا مازی» ئەشکەرە کرن، ل دەما ڤەگەرینێ دا ئەڤ دو بەرپرسێن پەیەدێ ژ ئالیێ سازیێن ئەولەهیێ یێن رەژیما سووریێ ڤە هاتنە دەستەسەرکرن و داخوازا زەلالکرنێ ژ پەیەدێ و رێڤەبەرییا خوەسەر کریە کا چما ژ ئالیەکێ داخوازا دانوستاندنێ لگەل رەژما سووریێ دا دکن و ژ ئالیەک دن بەرپرسێن وان دچن باژارێ «ئەلسویدا» و خەلکێ ل دژی رەژمێ هان ددن.
چاڤکانیێن مە هەر وەها ئەشکەرە کرن، ل همبەر داخوازا زەلالکرنێ یا رەژیما سووریێ ژ پەیەدێ، رێڤەبەریا خوەسەر و پەیەدێ بێ دەنگی هلبژارتیە و خوە ب خوەدیێن پرسگرێکا ڤان دو کادرۆیێن خوە نیشان نەدایە.
ژ ئالیێ خوە ڤە ئالدار خەلیل، کادرۆیێ پەکەکێ و ئەندامێ دەستەیا هەڤسەرۆکاتیا پەیەدێ، بێ ئاگاهیا خوە د ڤێ مژار دا راگهاندیە و ئێماژە ب ڤێ یەکێ دایە کو کەسێن هاتییە گرتن سەر ب ئەنجوومەنا سووریا دەمۆکراتیکن، ژ دەرڤەی ڤێ یەکێ هیچ هەلوەستەک دن ل همبەر گرتنا ڤان دو کادرۆیێن خوە نیشان نەدایە. ژ بەر ڤێ یەکێ هەیا نها ئەڤ دو کادرۆیێن پەیەدێ ژ بال رەژیما سووریێ ڤە نەهاتنە سەربەست بەردان.
