ھەسەدێ راگەھاند، چەند شەرڤانێن کو لگەل چەکدارێن داعشێ دا “نە ل گۆری پیڤانێن ئەخلاقی و سەربازی رەفتار کربوون”، ھاتن دوورخستن و سزاکرن.
ھەسەدێ راگەھاندیە، د ھەیاما چەند رۆژێن بۆری دا ھندەک دیمەن ل سەر سۆسیال مەدیایێ بەلاڤ بوونە کو د وان دیمەنان دا ھندەک شەرڤانێن وان لگەل وان چەکدارێن داعشێ یێن کو د شەرێ ھەسەکێ دا ھاتبوون گرتن، خراب رەفتار کرنە، ژ بەر وێ ژی ھاتنە دوورخستن و سزاکرن.
ھەسەدێ دایە زانین ژی، وان شەرڤانان پیڤانێن ئەخلاقی و سەربازی یێن ھەسەدێ بنپێ کرنە لەوما ھاتنە سزاکرن.
شەڤا پێنجشەمبێ 20ی چلەیا 2022یێ، ھێزێن سووریەیا دەمۆکراتیک (ھەسەدێ) راگھاند کو ل گرتیگەھا سیناعە یا ل تاخا خووێرانا حەسەکێ ئالۆزی دەرکەتیە و چەکدارێن داعشێ یێن ل وێ گرتیگەھێ دەست ب یاخیبوونێ کرنە و ھەژمارەک چەکدارێن شانەیێن نھێنی یێن داعشێ ژی ل دەرڤەیی گرتیگەھێ ئێرشی گرتیگەھێ کرنە.
ژ بۆ کۆنترۆلکرنا رەوشێ، ھەسەدە و ئاسایشا رۆژئاڤایێ کوردستانێ کەتن ئامادەبەشیێ و ھێزێن زێدەتر شاندن باژارێ حەسەکێ و دەردۆرا تاخا خووێران و گرتیگەھا سیناعە ب تەمامی دۆرپێچ کرن.
ژ وێ دەمێ ڤە ھەتا ئیرۆ شەر و پەڤچوون د ناڤبەرا ھسدێ و چەکدارێن داعشێ دا بەردەوامن و ھەسەدێ راگھاندیە، 10 ھەزار شەرڤان د کۆنترۆلکرنا رەوشا نە ئاسایی یا ل باژارێ حەسەکێ دا بەشدارن.
