ل گرتیگەھا حەسەکێ چ قەومی و داعشێ چاوا ئێریش کر؟

ل گرتیگەھا حەسەکێ چ قەومی و داعشێ چاوا ئێریش کر؟

گرتیگەھا ھەری مەزنا کو چەکدارێن دەستەسەرکری یێن داعشێ تێ دا بوون و د بن کۆنترۆلا ھێزێن سووریا دەمۆکراتیک (ھەسەدێ) دا بوو، د ناڤا 12 دەمژمێران دا کەتە دەستێ چەکدارێن داعشێ و دەست دانا سەر چەکێن ھەری پێشکەتی یێن ھەسەدێ.

تەڤی ھەبوونا 2 ھەزار و 500 پاسەوانان ل گرتیگەھێ، ب رێیا دەرخستنا ئالۆزیێ د ناڤا گرتیگەھێ دا و ب ئالیکاریا ھەژمارەک چەکدارێن ل دەرڤە، گرتیگەھ کەتە بن دەستێ چەکدارێن داعشێ.

شەڤا 20ێ چلەیێ، چەکدارێن داعشێ دو تەقین ل بەر دەرگەهێ زیندانێ ئەنجامدان، د ھەمان دەمی دا چەکدارێن د ناڤا گرتیگەھێ دا ئاگر بەردان ئالاڤێن گرتیگەھێ و ئالۆزی دەرخستن.

دەستپێکێ ھەسەدێ بانگەوازیا وێ یەکێ کر کو رەوش د بن کۆنترۆلا وان دایە و چ چەکدار نەرەڤیانە، لێ بەلێ پشتی گەھشتنا چەکداران بۆ ناڤ مال و تاخێن حەسەکێ و کوشتنا ھەژمارەک وەلاتیێن سڤیل، ئاشکەرا بوو کو ھەژمارەک چەکدار ژ زیندانێ رەڤیانە.

ھێزێن سووریا دەمۆکراتیک (ھەسەدە) ل سەر وێ یەکێ رژدە کو چ چەکدار ژ گرتیگەھێ نەرەڤیانە و ھێزێن وان کارینە چەکدارێن رەڤیایی دەستەسەر بکەن و ئەوێن دن ژی خوە رادەست کرنە، لێ بەلێ ھەسەدە د داخویانیەکێ دا دبێژیت؛ 3 ھەزار و 500 چەکدار دەستەسەر کرنە، کو ئەڤ ھەژمارە ژ 5 ھەزار چەکدارێن زندانیکری یێن ناڤ گرتیگەھێ نە.

ل گۆر ئامارێن رەوانگەھا سووری بۆ مافێن مرۆڤان، د شەرێ ناڤبەرا ھەسەدێ و چەکدارێن داعشێ دا نێزیکی 200 چەکدار ھاتن کوشتن، ئانگۆ ئەڤ تێ وێ واتەیێ کو چارەنووسا زێدەتری ھەزار چەکداران نە دیارە.

بەشەک ژ چاڤدێران دبێژن؛ ئێریشا داعشێ بۆ سەر گرتیگەھێ، تێ واتەیا تێکچوونا ھەسەدێ د پاراستنا ئەولەھیێ دا، ژبەرکو د داخویانیا چاپەمەنیێ دا کو پشتی کۆنترۆلکرنا گرتیگەھێ ھات ئەنجامدا، ھەسەدێ راگھاند کو بوویە 6 مەھ چەکدارێن داعشێ ئامادەکاریا ڤێ ئێریشێ دکر، ئانکو ھایا وان ژ پلانا ئێریشێ ھەبوو، لێ بەلێ نەکارین رەوشێ کۆنترۆل بکەن و تەڤی راگھاندنا کۆنترۆلکرنا گرتیگەھ و دەردۆرا وێ، ھەسەدێ دیار کر؛ نێزیکی 60 ھەتا 90 چەکدار هێژان ژی د ئاڤاھیەکا گرتیگەھێ دا مانە و خوە رادەست ناکەن و رووبروویی ھێزێن ھەسەدێ دبن.

شەڤا کۆنترۆلکرنێ، چەکدارێن داعشێ ژ دەردۆرا گرتیگەھێ ئێریشی خالەکا ھێزێن سووریا دەمۆکراتیک (ھەسەدێ) کربوون و ھەتا نھا ژی فرۆکەیێن ھەڤپەیمانیا ناڤدەولەتی پێگەھێن وان چەکداران ل ناڤ گرتیگەھێ و دەردۆرا وێ، بۆمبەباران دکەن.

د ڤێ دەمێ دا تەکەزی ل سەر وێ یەکێ تێ کرن کو تێکچوونا ھەسەدێ د پاراستنا گرتیگەھێ دا کو چەکدارێن داعشێ تێ دا زندانیکری بوون، ژ بلی کو ئەو دەڤەر رووبروویی مەترسیەکا مەزنا داعشێ دبیت، د ھەمان دەمێ دا چارەنووسا وان زارۆکێن داعشێ کو ژ ئالیێ چەکدارێن داعشێ ڤە ھاتنە پەروەردەکرن، نە دیارە.

ل گۆر راپۆرتا ھەری داوی یا ل سەر ڤێ مژارێ، چارەنووسا 700 زارۆکێن داعشێ کو د گرتیگەھێ دا بوون، ھەتا نھا ژی نە دیارە. ھەر چقاس ھەسەدە تەکەز دکەت کو وان ھەژمارەک مەزن ژ وان زارۆکان رزگار کرنە، لێ د ھەمان دەمێ دا ھەژمارەکا ب وردەکاری ل سەر ڤێ مژارێ ئاشکەرا ناکەت.

ھەماھەنگکارێ کارووبارێن مرۆڤی یێ نەتەوەیێن یەکبوویی دبێژیت؛ ب سەدان زارۆک ل گرتیگەھا حەسەکێ ھاتنە دۆرپێچکرن، نابیت ئەو زارۆک ل جھەکی ووسا بمینن و دڤێت ئەو زارۆک دەملدەست بهێنە رزگارکرن و ژ زیندانێ دەرکەڤن.

ژ ئالیێ خوە ڤە یۆنیسێفێ راگھاند؛ لگەل بەردەوامبوونا شەرێ حەسەکێ، مەترسی ل سەر وان زارۆکان ھەیە و ژ بەر وان ئالۆزیان، ھەتا نھا نێزیکی 45 ھەزار کەس ژ نشتەجیێن دەردۆرا گرتیگەھا گوێران ئاوارە بوونە و د دەما ئاوارەبوونێ دا 9 زارۆک وەندا بوونە و ژ مالباتێن خوە ڤەقەتیانە و دەربارێ وان دا هیچ ئاگاھیەک تونەیە.

د دەستپێکا ئالۆزیێن گرتیگەھا گوێرانێ دا ھەسەدێ بەحسا ھەبوونا جھێ زندانیکرنا زارۆکان ل ناڤا وێ گرتیگەھێ نەکربوو، لێ بەلێ چەند دەمژمێران پشتی داخویانیا یۆنیسێفێ، کو گۆتبوو مەترسی ل سەر ژیانا نێزیکی 800 زارۆکێن ل ناڤا گرتیگەھێ ھەیە، ھەسەدێ راگھاند؛ چەکدارێن داعشێ ئەو زارۆک دیل گرتنە.

نوونەرێ یۆنیسێفێ ژ دەستھلاتدارێن رۆژئاڤایێ کوردستانێ و ئالیێن ناکۆکێن وێ دەڤەرێ داخواز کر؛ شەری راوەستینن و زارۆکێن کو ھاتنە دیلگرتن، رزگار بکەن و وان بپارێزن، پشترا ژی وان زارۆکان بشینن وەلاتێن وان و د گرتیگەھێ دا چ زارۆکان نەھێلن.

ھەتا نھا ژی ئالۆزیێن ل گرتیگەھا گوێران ب داوی نەبوونە، ھەسەدە دبێژیت؛ 60 ھەتا 90 چەکدارێن داعشێ خوە د ناڤا ئاڤاھیەکا گرتیگەھێ دا ڤەشارتنە و خوە رادەست ناکەن.

رەوانگەھا سووری بۆ مافێن مرۆڤان ژی راگھاند؛ پشتی کۆنترۆلکرنا گرتیگەھێ، ب دەھان تەرمێن چەکدارێن داعشێ د ناڤا زیندانێ دا ھاتنە دیتن و ل گۆر ئامارێن ھاتینە راگھاندن؛ ژ شەڤا 20ێ ڤێ مەھێ ھەتا نھا، 173 چەکدارێن داعشێ ھاتنە کوشتن و زێدەتری 120 ئەندامێن ئاساییش و ھەسەدێ ژی ژ بۆی نەخوەشخانەیان هاتنە ڤەگوهاستن.

K24

پوستێن ھەمان بەش