رێخستنا په‌كه‌كێ ل داوییا سالا رابووری راگه‌هاندبوو، د سالا نوو دا واته 2022ێ ئه‌و دێ به‌رخوه‌دانێ گه‌ش كه‌ن، په‌كه‌كێ ئه‌ڤ سۆزا خوه بجهـ ئینا و به‌رخوه‌دان ل ناڤا گوندێن هه‌رێما كوردستانێ گه‌ش كر، ب وێ ئارمانجێ كو ئه‌ڤ گوندێن ته‌نا و رحه‌ت ژ خه‌لكی بهێنه ڤالا كرن و ببنه مه‌یدانا شه‌ری.
بالافرێن جه‌نگ یێن ده‌وله‌تا ترك یا داگیركه‌ر، ئیرۆ رۆژا شه‌مبی 29/1/2022ێ لڤ و ته‌ڤگه‌رێن چه‌كدارێن په‌كه‌كێ، ل گوندێن قونتارا چیایێ مه‌تینا ل سنۆرێ ئامێدیێ و ل ده‌ڤه‌را به‌رواری بالا، یێن ل هه‌رێما كوردستانێ مووشه‌ك باران كرن، زیان ب خه‌لكێ گوندان كه‌تییه.
هه‌ر یێك ژ گوندێ سگێری و گوندێ هرۆرێ ل چه‌ند ساعه‌تێن ده‌رباسبوویی كه‌تنه به‌ر هێرشێن ئاسمانی و ژ بلی زیانێن ماددی كو ب خه‌لكێ ڤان گوندان كه‌تینه، ترسه‌كا زێده ژی ل جه‌م وان چێبوویه.
رێخستنا په‌كه‌كێ یا كو ئه‌ڤ 41 ساله هاتییه دامه‌زراندن و 37 ساله ژی شه‌رێ چه‌كداری دكه‌ت، هێژان یێك مه‌ترا خاكا كوردستانێ ژ ده‌ستێ داگیركه‌ران رزگار نه‌كرییه، به‌ره‌ڤاژی ئه‌و هاتییه د تاكه پارچه‌یا ئازاد یا كوردستانێ دا، به‌هانه‌یان دده‌ته ده‌ستێ دژمنی ژ بۆ كو ئه‌ڤ ده‌ر ژی وێران ببیت.
ده‌وله‌تا ترك ل سالا رابووری ل مه‌ها نیسانێ، هێریشه‌كا به‌رفره‌هـ ل دژی په‌كه‌كێ ل باشوورێ كوردستانێ ده‌ست پێ كر و ژ وی ده‌می، هه‌ژماره‌كا گوندێن سنۆرێ پارێزگه‌ها دهۆكێ ڤالا بووینه و بووینه مه‌یدانا شه‌ری و چه‌ند پاشتره خه‌ته‌رییا ل سه‌ر گوندێن ئاڤه‌دانكری ژی پتر لێ دهێت.
په‌كه‌كه ژ بۆ كو خوه ژ هێرشێ ده‌وله‌تا ترك بپارێزیت، لڤ و ته‌ڤگه‌را چه‌كدارێن خوه ئێخستییه د ناڤا گوندان دا و ژ به‌ر ڤێ ئه‌ڤ گوند به‌رده‌وام دكه‌ڤنه به‌ر هێرشان و زیانێن گیانی و ماددی ب خه‌لكێ وان كه‌تینه.
